Alkatiri Husu Ministru Sira Konvida Câmara de Contas Halo Auditoria

0
272

DILI (TATOLI) Primeiru Ministru, Mari Alkatiri liu hosi enkontru konsellu ministru husu ba ministru sira atu konvida Câmara de Contas hodi halo auditoria ba kada ministériu, liu-liu ba ministériu infraestrutura, Finansas no Turizmu.

“Primeiru-Ministru husu ba ministériu sira, liu-liu ba infraestrutura, finansas no turizmu atu bele husu sólisitasaun (konvida) ba Câmara de Contas atu bele hahú halo auditoria”, Sekretáriu Estadu Konsellu Ministru no Komunikasaun Sosiál, Matias Boavida fó sai apelu Primeiru Ministru ne’e ba jornalista sira iha Palásiu Governu, ohin.

Nia dehan, Xefe Governu informa ba ninia membru sira katak horisehik (Tersa) nia ba ona Tribunal Superior Administrativu Fiskál no Kontas, ne’ebé hanesan órgaun kompetente hodi haruka hahú auditoria iha Rejiaun Administrativu Espesiál Oekusi Ambenu (RAEOA) maski antes ne’e halo ona, maibé rezultadu seidauk publika.

Entretantu Foin lais ne’e, bainhira hala’o diálogu ho entidade hotu konaba programa Governu dahituk iha munisípiu Aileu, Primeiru-Ministru, Marí Alkatiri fó sai Governu ne’ebé nia lidera hakarak iha justisa sosiál no justisa ekonomia ba povu tomak, tanba ne’e tenke iha auditoria.

(Jornalista: Julia Chatarina)

(Editór : Manuel Pinto)

HUSIK IDA HATÁN