Alemaña Apoiu Fundu Kapasita Foinsa’e Sira

0
69
Foto espesiál

DILI, (TATOLI) – Governu Alemaun liuhusi GIZ (Gesellschaft für Internationale Zusammenarbeit) ka empreza internasionál Alemaña nian apoiu fundu euro milaun hitu resin ba governu Timor-Leste (TL) hodi kapasita rekursu umanu liu-liu foinsa’e timoroan.

“Iha Alemaña mós iha problema oituan hanesan ita, governu seidauk, la eziste. Ita agradese loos tanba ho situasaun hanesan ne’e ita bele hetan fundus ida boot, sete ponto quatro milhões euro”, haktuir Vise-Ministra Negósiu Estranjeiru no Kooperasaun, Adaljiza Magno, iha MNEK Praia dos Coqueiros, sesta ne’e.

Fundu apoiu ne’e anúnsia liuhusi koordenadór GIZ Karl Heinz Franz bainhira halo vizita koretézia ofisiál ho MNEK.

Governante ne’e hateten populasaun iha Timor-Leste maioria juventude, ida ne’e simu osan barak tebes atu ajuda halo kapasitasaun.

“Sira sempre barak liubá agrikultura mas foka ba espesífiku seidauk. Sira hateten ona katak sira garantia osan hanesan ne’e. Depois projetu ne’ebé mak kuandu atu la’o, parte Alemaña sei halo diskusaun ho ita-nia ministériu kompetente para atu haree, atu implementa programa saida, tuir nesesidade Timor nian”, esplika ministra Adaljiza Magno ba profisionál komunikasaun sosiál sira bainhira konfirma kona-ba área espesífika.

Durasaun, apoiu ne’e fó hahú husi 2018 to’o 2022. “Purtantu tinan lima”, katak tan ministra ne’e iha Ministériu Negósiu Estranjeiru no Kooperasaun (MNEK) perante jornalista mídia imprensa no elektrónika sira.

Nia akresenta formasaun  ba foinsa’e sira iha área barak. “Mas ida ne’e implementa bazea ba polítika husi polítika Sekretáriu Estadu Juventude nian”, konklui.

Monica Leixa abitante Delta II hatete apoiu ne’ebé governu Alemaun fó ho esperansa bele dezenvolve foinsa’e sira hodi kontribui ba Nasaun.

“Ha’u kontente tebes ho apoiu ne’e tanba nasaun seluk ajuda ita ho buat ne’ebé di´ak no buat ne’ebé tuir ita-nia nasaun presiza”, katak estudante eskola sekundária privada, Canossa Dili.

Nia garante apoiu ne’e bele fó mós oportunidade, sei uza didi’ak atu bele hetan apresiasaun husi ema seluk ho esforsu ne’ebé posível.

“Ha’u hakarak fó obrigada diretamente ba Alemaña tanba sira mós ajuda ita hodi dezenvolve Timor-Leste ba oin”.

Notísia relevante; http://www.tatoli.tl/2017/12/alemana-iha-prontidaun-tulun-tl/

Jornalista: Rafy Belo

Editora: Rita Almeida

HUSIK IDA HATÁN