DILI (TATOLI)—Primeiru Ministru, Marí Alkatiri hateten Ministru Adjuntu Primeiru Ministru, Agio Pereira maka sei asina akordu Delimitasaun Fronteira Marítima entre Timor-Leste no Austrália iha Nova Iorke, Estadus Unidus Amérika, 6 Marsu (fulan oin).
“Loloos, sé maka halo negosiasaun no halo akordu, ninia naran maka tenke tau iha istória ka asina Delimitasaun Fronteira Marítima, maibé ha’u rona informasaun katak Xefe Negosiadór Delimitasaun Fronteira Marítima, Xanana Gusmão lakohi asina. Tanba ne’e, Ministru Adjuntu Primeiru Ministru, Agio Pereira maka sei asina,” Xefe Governu hato’o informasaun ne’e ba jornalista sira iha Palásiu Prezidente Nicolau Lobato, Bairru Pité, Dili, kinta ne’e.
Marí hateten, hanesan xefe Governu, nia laiha kompeténsia atu asina akordu refere, maibé entrega ba Agio Pereira tanba antes ne’e Agio Pereira involve ona iha asuntu Delimitasaun Fronteira Marítima ninian.
Iha biban ne’e, nia promete, hafoin asina akordu, nia iha ajenda atu hasoru malu ho Xefe Negosiadór Delimitasaun Fronteira Marítima, Xanana Gusmão iha rai li’ur no sei tau imajen hasoru malu nian ne’e iha meius komunikasaun para públiku bele haree.
Objetivu hasoru malu ho Xanana, tuir Marí, ko’alia kona-ba akordu Delimitasaun Fronteira Marítima, maibé sei la ko’alia kona-ba polítika rai laran nian.
(Jornalista: Xisto Freitas)
(Editór : Manuel Pinto)
