DILI, (TATOLI – Primeiru-Ministru, Marí Alkatiri, segunda semana ne’e formaliza ona pedidu auditória ba operasaun jestaun finanseira no konta nian husi tezouru Ministériu Obra Públika, Transporte no Komunikasaun, Ajénsia Dezenvolvimentu Nasionál (ADN), Fundu Infraestrutura no Ministériu Turizmu ne’ebé maka kobre períodu korrespondente ba lejizlatura husi loron 9 fulan-agostu 2012 to’o loron 14 fulan-setembru 2017.
Pedidu ne’e mai hafoin solisitasaun atu hala’o auditória daruak ba operasaun jestaun finanseira no konta nian hotu-hotu husi Autoridade Rejiaun Administrativa Espesiál Oekusi Ambenu (ARAEOA) ne’ebé kobre períodu tinan 2016 to’o agora, haruka ona iha loron 6 fulan-fevereiru liubá.
Tuir nota komunikadu ne’ebé Tatoli simu ohin, haktuir karta ne’ebé maka dirije ba Prezidente Tribunál Rekursu no Tribunál Superiór Administrativu, Fiskál no Kontas (TSAFK), juíz Deolindo dos Santos, Primeiru-Ministru justifika kona-ba pedidu auditória nian hodi deklara jestaun país nian tenke regula iha momentu hotu-hotu, husi prinsípiu rigór, tranparénsia no responsabilizasaun nian, lahó exesaun.
Tanba ne’e presiza duni atu garante transparénsia iha administrasaun públika, hodi promove kultura rigór no responsabilizasaun nian ida iha jestaun kona-ba rekursu finanseiru sira Estadu nian. (ki)