iklan

NASIONÁL

Ministru Valentim Husu Autoridade Suku Fasilita Deklarasaun Ba Sidadaun

Ministru Valentim Husu Autoridade Suku Fasilita Deklarasaun Ba Sidadaun

Sesaun foto hamutuk Ministru Administrasaun Estatál, Valentim Ximenes no partisipante sira iha salaun Delta Nova, ohin. Foto Tatoli/Julia Chatarina

DILI, (TATOLI) – Ministru Administrasaun Estatál, Valentim Ximenes, husu ba autoridade suku atu fasilita deklarasaun ba sidadaun, liu-liu ba estudante universitáriu husi munisípiu 12 inklui Rejiaun Administrativu Espesiál Oekusi Ambeno (RAEOA) ne’ebé agora dadaun iha Dili no hakarak muda rezidénsia provizóriu atu bele tuir eleisaun.

“Muda kartaun eleitorál tanba estudante universitáriu sira ne’ebé mai husi munisípiu 12 inklui RAEOA ne’ebé muda mai Dili hakarak muda sira nia rezidénsia atu bele vota iha fatin ne’ebé sira hakarak, tanba ne’e apela ba xefe suku no konsellu suku sira, emite deklarasaun sem rezerva atu fasilita sidadaun eleitór sira ba espressa sira nia direitu votu”, hatete ministru iha ninia intervensaun durante sorumutu preparative ba eleisaun antesipada parlamentár iha salaun Delta Nova, ohin.

Nune’e mós, governante ne’e afirma atu aumenta taxa partisipasaun governu sei revee fila fali dekretu governu atu aumenta urna lori ba sentru votasaun husi fatin ne’ebé mak ema menus eleitór no tau iha ema barak ninia leet atu hotu-hotu bele asesu.

Ho aumenta suku 10 foin lalais ne’e, tuir nia uma barak seidauk muda ninia rezidénsia, tanba ne’e rezolusaun governu atu permite ema ne’ebé iha suku foun bele muda ba suku ne’ebé uluk nia hela ba (rezidénsia antiga).

“Buat hotu ita halo atu ema hotu iha posibilidade ba urna atu partisipasaun aas iha ita nia eleisaun, ida ne’e ita halo la’ós tanba ita halo eleisaun antesipada maibé atu hadi’a ita nia prosesu eleitorál iha futuru”, dehan tan

Tanba ne’e  nu’udar órgaun superiór ba administrasaun, nia husu ba autoridade lokál sira husi munisípiu ho postu administrativu atu fasilita no suporta prosesu inísiu (resensiamentu) atu identifika ema nia nasionalidade no naturalidade atu partisipa iha eleisaun.

Parte seluk Diretór Jerál Sekretariadu Tékniku Administrasaun Eleitorál (STAE), Acilino Branco, hateten nu’udar sidadaun tenke submete ba lei númeru 6/2016 katak resensiamentu aktu ida obrigatóriu ba sidadaun hotu no atu ba vota regula iha lei tuir unidade jeográfika (tuir rezidénsia ne’ebé eleitór rejistu).

STAE haree hela meiu tékniku balun atu fasilita eleitór foun sira ba rejistu no eleitór sira ne’ebé atualiza bele asesu, husi ne’e mak tenke iha prosedimentu balun ne’ebé tenke kumpri, liu-liu atu hetan dokumentu komprovativu balun atu justifika ninia rezidénsia foun ba proseu autualizasaun nian.

Tuir lei bainhira eleitór sira atu muda hela fatin, tenke ho dokumentu komprovativu hanesan sidadaun no domisili foun husi suku tanba ne’e ezije atu lori dokumentu husi suku.

“Liuhosi sorumutu ne’e ita husi administradór postu administrativu sira husu xefe suku sira hodi fasilita deklarasaun, liu-liu iha Dili sai hanesan sentru konsentrasaun ba sidadaun, liuliu estudante universitáriu atu asesu ba deklarasaun sira atu kompleta dokumentu seluk”, tenik.

Entretantu sorumutuk ne’ebé fasilita husi United Nations Development programme (UNDP) nu’udar organizasaun ida ne’ebé sempre sai parseiru governu iha aktu eleitorál.

Aleinde ne’e partisipante seluk mak autoridade lokál no seguransa, órgaun eleitorál sira husi munisípiu 12 inklui RAEOA hanesan administradór munisipál, Prezidente autoridade munisipál, administradór postu administrativu, delegadu STAE iha munisípiu, komandante jerál no munisipál Polísia Nasionál Timor-Leste (PNTL).

Jornalista: Julia Chatarina

Editora: Rita Almeida

iklan
iklan

Leave a Reply

iklan
error: Content is protected !!