2012 Too Agora Kaer Ona Sidadaun Estranjeiru 386

0
71
Fontes : Google

DILI, (TATOLI)-Inspetór Jerál Traballu, Sekretáriu Estadu Juventude no Traballu (SEJT), Aniceto Leto Soro hatete, operasaun Konjunta (SEJT-Migrasaun) ne’ebé hahú iha tinan 2012 mai to’o agora (2018) kaer ona ema estranjeiru pur volta 386 ne’ebé mak hala’o atividade ilegál iha Timor-Leste.

Kooperasaun ne’e ho Servisu Migrasaun hodi halo espulsa husi territóriu nasionál Timor-Leste nian ou aplika sansaun ba sira depois halo tratamentu dokumentu atu serbisu legalmente.

Inspetór Jerál Traballu, Sekretáriu Estadu Juventude no Traballu, Aniceto Leto Soro. Foto Tatoli/Egas Cristovão.

“Sira ne’e traballadór ilegál. Sira selu multa ki’ik liu mak U$230 kada pesoa no boot mak U$1150, ita-nia operasaun ne’ebé mak ita halo ne’e, ita aplika multa ba 386 ne’e iha dólar mil 62.330”, Aniceto hatete iha Kaikoli, horisehik.

Atu deteta tan traballadór ilegál iha territóriu laran, Aniceto hatete daudaun ne’e hasoru problema tanba osan laiha.

“Mezmu duodésimu ita labele halo kobertura ba munisípiu hotu, tanba duodésimu ne’e ita halo ezekusaun fulan-fulan de’it, iha 25 ita tenke hato’o relatóriu entaun ita laiha forsa atu ezekuta. Agora ne’e ita hala’o serbisu ho vontade de’it, hanesan daudaun ami halo serbisu bá fatin sira ne’e laiha per diem tanba osan laiha”.

Maski hasoru situasaun sira ne’e la impede kompromisu atu serbí nasaun. “Baibain ami buka meiu liuhusi komunikasaun, koordenasaun atu fó informasaun ne’ebé klaru atu ita bá diretamente fatin ne’ebé mak ita identifika, se ita buka ne’e lahetan, maibé ita esforsu nafatin ho orsamentu ne’ebé laiha”.

Jornalista : Maria Auxiliadora

(Editór : Manuel Pinto)

 

HUSIK IDA HATÁN