DILI (TATOLI)-Sekretáriu Estadu Juventude no Traballu (SEJT) halo ona koordenasaun ho Embaixada Korea iha Timor-Leste atu hamenus traballadór ilegál hamutuk 474 iha Korea tanba iha impaktu boot mak Governu Korea bele halo redusaun ba kuota ne’ebé fó.
SEJT, Nívio Leite Magalhães, hatete bainhira lá rezolve problema serbisu-na’in ilegál sira ne’e maka bele iha risku atu hapara programa ida ne’e.
“Governu Korea mak sei hapara kuandu ita lahalo redusaun”, Nívio hatete iha Palásiu Governu, ohin.
Atu hamenus númeru traballadór ilegál ne’e, SEJT serbisu hamutuk ho embaixada Korea iha Timor-Leste no embaixada Timor-Leste nian iha Korea para bele buka solusaun ba kestaun ida ne’e.
“Agora hahú ona ho embaixada Korea ho parte reprezentante Ministériu Traballu no Empregu nian nó mós sei halo komunikasaun formál ida ba embaixada Timor-Leste iha Korea”.
Sobre adidu Timor-Leste nian ba Korea ne’ebé daudaun ne’e laiha tanba remata ona serbisu iha dezembru 2017, SEJT halo ona komunikasaun ho embaixada Timor-Leste iha Korea atubele fasilita serbisu balun iha ne’ebá nomós sei halo pedidu ofisiál ida atu husu embaixadór bele ajuda tau matan ba traballadór ne’ebé agora hala’o serbisu iha país refere.
“Adidu sei haree tanba orsamentu ne’e mós duodecimo nian depois adidu ne’e bá oin ita presiza haree didi’ak tanba sei sai mós ema ida ka reprezenta Sekretáriu Estadu Juventude no Traballu hodi bá halo serbisu para atu haree traballadór sira”.
(Jornalista : Maria Auxiliadora)
(Editór : Manuel Pinto)
