Eleisaun Antesipada Realiza iha Maiu

DILI (TATOLI)—Eleisaun antesipada sei hala’o iha segunda semana Maiu, tinan ne’e, maibé data konkreta Prezidente Repúblika, Francisco Guterres Lú Olo maka sei dekreta no pronúnsia.

Desizaun ida ne’e fó sai hafoin enkontru entre Ministru Administrasaun Estatál, Valentim Ximenes, Diretór Jerál Sekretariadu Tékniku Administrasaun Eleitorál (STAE), Acelino Branco, Prezidente Komisaun Nasionál Eleisaun (CNE), Alcino Barris no Prezidente Repúblika, Francisco Guterres Lú Olo iha Palásiu Prezidente Nicolau Lobato, Bairru Pité, Dili, segunda ne’e.

“Ohin nu’udar loron ultimo ami mai hato’o kalendáriu eleitorál ba Prezidente Repúblika, hafoin halo tiha ezersísiu boot ida ami konsege hetan kalendáriu ida di’ak ne’ebé rezultadu mai hosi opiniaun hotu-hotu liu-liu órgaun eleitorál hanesan CNE, STAE no Prezidente Repúblika. Ami bele dehan katak eleisaun ne’e hala’o iha Maiu nia laran maibé data só Prezidente Repúblika maka dekreta no pronúnsia,” Valentim informa.

Nia dehan preparasaun atu realiza eleisaun refere hala’o daudaun ona, liu-liu hahú halo rekrutamentu ba ofisiál STAE, brigada sira iha territóriu tomak, sei lansa resenseamentu eleitorál anível nasionál iha Munisípiu Ermera iha Kinta (8/02) no semana oin sei haruka tékniku sira ba iha rai li’ur hanesan Irlanda, Inglaterra, Korea Súl, Portugal no Austrália, atu atualiza eleitór sira nia kartaun eleitorál.

Governante ne’e hateten orsamentu atu realiza eleisaun antesipada ho montante dollar amerikanu 5 millions, ne’ebé mai hosi orsamentu jerál Estadu.

Valentim afirma katak sira iha opsaun oi-oin atu bele garante sidadaun sira nia partisipasaun iha eleisaun ne’ebé mai maka hanesan, ida, permite atu ema muda rezidénsia provizóriamente ba sentru sira iha urbanu ezemplu Dili, Baucau, Ermera no sel-seluk tan atu ema bele ba partisipa maibé hafoin eleisaun tenke muda fali kartaun eleitorál ba rezidénsia orijinál.

Rua, tanba iha limitasaun orsamentu, ne’e duni sei buka dalan atu bele transporta eleitór sira ba ida-idak nia munisípiu ka lae.

Tolu, aumenta urnas. Haat, atu garante sidadaun nia partisipasaun ba vota, STAE sei prepara fali kaixa ketak ida para bainhira ema mai vota, husik hela nia kartaun no hafoin eleisaun maka bele mai foti kartaun. Ida ne’e prepara ba sira ne’ebé kartaun eleitorál hosi munisípiu maibé hakarak vota iha sidade ne’ebé nia hela ba.  

(Jornalista: Xisto Freitas)

(Editór : Manuel Pinto)