Xanana Alternativa Hakotu Impasse

0
1437
Kay Rala Xanana Gusmão hafoin enkontru ho lider partidu FRETILIN iha Hotel Novo Turizmu Lecidere, ohin. Foto Tatoli/Antonio Goncalves

DILI (TATOLI)—Lider Partidu Kmanek Haburas Unidade Timoroan (KHUNTO) fó hanoin ba Prezidente Repúblika katak Kay Rala Xanana Gusmão bele fó solusaun pozitivu ba impasse polítika ne’ebé ohin loron iha.

Tuir  Sekretáriu Jerál KHUNTO, José Agostinho, Xanana Gusmão nia lideransa maizumenus fulan ida de’it bele fó solusaun ona problema ne’ebé mak iha, tanba ne’e se Prezidente fó oportunidade ba segundu mais votadu (CNRT) atu forma governu, KHUNTO prefere Xanana Gusmão nu’udar Primeiru Ministru.

Konsellu Superiór Partidu KHUNTO dadalia ho jornalista sira iha Palásiu Prezidente Nicolau Lobato, ohin, hafoin enkontru ho Xefe Estadu Lú Olo. Imajen Xisto Freitas

“Tanba ita nia matadalan ba rezisténsia, Kay Rala Xanana Gusmão sei moris, ami sei fó konfiansa tomak ba nia (Kay Rala Xanana Gusmão) para lidera Oitavu Governu Konstitusionál ida ne’e,” Sekretáriu Jerál KHUNTO, José Agostinho hato’o lia hirak ne’e ba jornalista sira iha Palásiu Prezidente Nicolau Lobato, Bairru Pité, Dili, Tersa loro kraik ne’e, hafoin soru-mutu ho Prezidente Repúblika, Francisco Guterres Lú Olo kona-ba inserteza polítika iha rai laran.

Razaun seluk KHUNTO defende Xanana Gusmão nu’udar Primeiru Ministru hodi subliña deklarasaun KHUNTO ne’ebé antes ne’e halo ona liuhusi mídia nasionál sira.

Iha enkontru ho Xefe Estadu, KHUNTO sujere ba Prezidente Repúblika, Francisco Guterres Lú Olo konvida partidu segundu mais votadu (CNRT) ho nia aliadu sira atu forma Oitavu Governu Konstitusionál.

“CNRT ho nia aliadu (PLP, KHUNTO) agora halo konjuntura polítika ida forte iha Parlamentu Nasionál ne’ebé kompostu hosi deputadu hamutuk na’in 35. Fiar katak ho asentu kadeira hamutuk 35 iha Parlamentu Nasionál, bele asegura estabilidade governativa,” nia esplika.

“Iha tempu liu-ba, Prezidente Repúblika bele konvida partidu rua ho kadeira 30 de’it bele forma Governu, tanbasá labele konvida CNRT ho nia aliadu sira ho kadeira 35 atu forma Governu,” Agostinho kestiona.

(Jornalista: Xisto Freitas)

(Editór : Manuel Pinto)

HUSIK IDA HATÁN