UNTL sei Partisipa “International Seminary” iha UKAW

0
87
Reitór Universidade Nasionál Timor-Lorosa´e (UNTL), Francisco Miguel Martins.

DILI, (TATOLI) – Universidade Nasionál Timor Lorosa’e (UNTL) sei partisipa “International Seminary” iha Universitas Kristen Arta Wacana (UKAW), Kupang-Indonézia, ho tema Food Security, Climate Change no Biodiversity.

“Ha’u dehan nune’e UNTL asina ona akordu ho instituisaun públika no privada liu ona 200 iha kontinente hotu, tanba ne’e konvite ne’ebé UKAW fó ba ita iha (24 janeiru) ne’e atu tuir semináriu internasionál iha Kupang ho tópiku ne’ebé interesante tebes”, haktuir reitór Francisco Miguel Martins, iha Kampus sentrál UNTL tuir nota komunukasaun ne’ebé TATOLI asesu, ohin.

Akordu ho instituisaun públika no privada ne’ebé mak UNTL halo ona eziste iha kontinente Áfrika, Amérika, Ázia, Europa no Oseania.

Rede internasionál sira ne’ebé universidade públika ne’e integra mak hanesan AULP (Associação das Universidades da Língua Portuguesa), FORGES (Fórum de Gestão do Ensino Superior nos Países e Regiões da Língua Portuguesa), RIPES (Rede de Instituções Públicas do Ensino Superior).

Inklui, Indonesia, Timor-Leste, Australia Academy Partnership; parseria entre universidade lima iha Timor-Leste, lima iha Indonézia no ida iha Austrália; ho intensaun hodi dezenvolve objetivu komun iha domíniu edukasaun, formasaun no peskiza.

Reitór Francisco Miguel Martins klarifika UKAW iha inisiativa konvida UNTL tanba universidade públika ne’e nu’udar instituisaun edukasaun superiór ida ho espriénsia di’ak hodi bele partilla tópiku sira: Food Security, Climate Change no Biodiversity.

Tópiku ne’e relevante tebes ba UNTL nia Sentru Biodiversidade liuhusi peskiza no aprezenta ona iha konferénsia internasionál sira kona-ba Climate Change (mudansa klimátika) no biodiversidade.

No entanto, Food Security (Seguransa alimentár) CNIC ho UN hala’o ona peskiza no semináriu”, tenik Reitór.

CNIC ne’e katak Centro Nacional da Investigação Científica  no UN (United Nations) eh Nasaun Unida sira. CNIC ne’e nia misaun iha UNTL mak dezenvolve sistema no métodu investigasaun ne’ebé bele kontribui ba kuñesimentu di’ak liu ba problema sira ne’ebé mak afeta Timor-Leste.

Kapasita timoroan sira ba nível internasionál kona-ba prátika di’ak liu sira iha métodu investigasaun.

Providénsia aliserse kona-ba ekonómia globál no bem-estar social liuhusi investigasaun no dezenvolvimentu ba kuñesimentu iha Timor-Leste. Nune’e mós dezenvolve baze kapasidade institusionál ne’ebé mak di’ak hodi apoiu prosesu edukasaun ba tempu naruk nian.

Enkuantu kona-ba biodiversidade, UNTL iha CPMCB (Centro Para a Mudança Climática e Biodiversidade); iha vizaun atu minimiza impaktu husi mundansa klimátika no hasa’e konservasaun ba biodiversidade iha Timor-Leste no buka implementa polítika dezenvolvimentu ida sustentável ba nasaun.

Entretantu, UNTL no UKAW sei asina Nota de Intendimento eh MoU (Memorandum of Understanding) iha tempu tuir mai. Kona-ba “International Seminary” tuir informasaun sei akontese iha setembru 2018.

UKAW nu’udar ensinu superiór privadu ida iha Kupang-Indonézia. Universidade ne’e nu’udar progresu husi Akademi Theologia Artha Wacana. UKAW harii iha loron haat setembru 1985. Nia reitór atuál mak Frankie Jan salean.

Jornalista: Rafy Belo

Editora: Rita Almeida

HUSIK IDA HATÁN