UNTL Kompartilla Koñesimentu “Cidadão Responsável” Ba Seminarista Sira

0
55
Oradór Reitór Francisco Miguel Martins. Foto: Mídia UNTL

DILI, (TATOLI) – Reitór Universidade Nasionál Timor Lorosa’e (UNTL), Francisco Miguel Martins, iha ninia palestra intituladu “Cidadão Responsável”, ba seminarista sira iha Semináriu-Nossa Señora de Fátima Balide, hodi inísia tinan letiva 2018 iha salaun Balide-Dili, segunda (15/1) hateten sidadaun responsável forma ema ho exelente hodi serbí.

Mídia Komunikasaun UNTL relata eventu ne’e atu joven sira futuru mai hariiku sira aan ho matenek no hatene sira-nia responsabilidade nu’udar sidadaun, obrigasaun no dever sira.

Ho nune’e nia apresia tebes padre reitór, Pe. Angelo Salsinha nia ideia iha tinan létivu ne’e atu haree ba futuru Nasaun nian ho ita-nia responsabilidade ida-idak nian.

“Tanba ne’e husi universidade nia pontudevista sientífika atu aumenta tán edukasaun husi uma ida ne’e fó”, akresenta.

Nia hato’o ba seminarista sira, futuru bele sai lideransa ho digna, morál-étika i polítiku ida di’ak, aproveita formasaun ne’e hanesan osan-mean hodi hola parte ba futuru uma-kreda no Timor nian.

Reitór Semináriu menór Nossa Señora de Fátima, Pe. Angelo Salsinha akresenta vizaun husi semináriu ne’e maka forma ema ho exelente, iha matenek hodi sai servidór ba uma-kreda no servidór ba Nasaun.

“Agradese ba magnifiku reitór no ho esperansa katak liuhusi palestra ne’e bele loke orizonte koñesimentu hanesan ekipa formadora nu’udar professór, estudante ho konsellu dos pais, hotu-hotu hatene responsabilidade ho étika, domin hodi hadomi ita-nia rai, ita-nia kreda”, agredese amu ne’e.

Eventu ne’e hetan partisipasaun másima husi seminarista sira, konsellu-inan-aman, professór, no estrutura semináriu menór nian.

Jornalista: Rafy Belo

Editora: Rita Almeida

HUSIK IDA HATÁN