Umildade Sasukat Ukun-Na’in Di’ak

0
182
Prezidente Repúblika, Francisco Guterres Lú Olo. Imajen Mídia Palásiu PR.

DILI (TATOLI)—Prezidente Repúblika, Francisco Guterres Lú Olo hateten ukun na’in ukun di’ak bainhira haraik-an (umilde) no hadomi povu.

“Ukun-na’in bele ukun di’ak bainhira hakraik-an no hadomi povu. Ukun-na’in labele ukun bainhira la hadomi. Bele tau orden ruma maibé labele ukun,” Xefe Estadu hasara Sua Santidade Papa Francisco nia liafuan liuhusi selebrasaun misa Loron Três Reis Magos iha Katedrál Dili, domingu horisehik.

Tuir nia, hakraik-án ne’e signifika ukun-na’in sira tenke hatene rona, hatene sukat no hatene haksesuk, ho laran-hakmatek, hanoin oin-seluk husi ema ne’ebé de’ it no hatutan katak ukun di’ ak bele akontese de’ it bainhira ukun-na’in sira hatene ko’alia ba malu no hatene serbí bem-komún.

“Hatene serbí signifika ukun-na’ in sira halo buat hotu-hotu atu sai matadalan ba aspirasaun povu nian, buat di’ak sira ne’ebé Povu hakarak hetan iha sira-nia moris loron-loron nian,” nia subliña.

Nia hatutan ema hili partisipa iha vida polítika tanba preokupa ho ema hotu ninia kondisaun moris no iha interesse atu promove moris di’ak ba ema hotu-hotu. Nu’udar sidadaun konxiente, tuir nia, ita hotu iha devér atu buka-hatene no tetu didia’k sá polítika mak ukun-na’in sira hala’o, oinsá sira uza osan Estadu nian atu hala’ o dezenvolvimentu no oinsá sira hadi’a ema hotu ninia kondisaun-moris.

“Iha Timor-Leste, povu mak hili rasik ukun-na’in sira, tinan lima-lima. Ita hili sira tanba ita fiar katak sira bele simu responsabilidade atu ukun ho di ‘ak. Nu’udar ukun-na’in ho fiar hosi povu, sira tenke hatene-án katak, iha tinan lima nia laran, sira tenke prova katak sira ukun-na’in duni ka lae; sira merese povu ninia fiar ka lae. Signifika katak sai de’it ukun-na’in seidauk to’o. Tenke hatudu rezultadu di’ak ba povu nia moris-di’ak, husi sira-nia ukun,” Lú Olo haklaken.

Prezidente Repúblika informa, atu hetan solusaun ba problema ne’ebé de’ it, iha nível família nian ka komunidade nian ka nasaun nian, presiza rekuñese ida-idak nia matenek, ida-idak ninia kualidade, ida-idak ninia kontribuisaun atu hetan solusaun ba problema, la’ós kontribui fali ba problema.

“Ha ‘u aproveita loron ohin atu apela ba maluk sira ne’ebé eleitu hosi povu, atu hakraik-án no serbí Estadu no povu ho domin. Servidór Estadu nian la ‘ós atu hala’o prestasaun serbisu ida, iha tempu badak ka naruk, atu haree ba ninia án, ninia família ka ninia partidu. Serbí Estadu ne’e vokasaun ida, misaun ida ne’ebé servidór kumpre ho sentidu dever no responsabilidade atu lori moris-di’ak ba ema hotu-hotu, atu kore povu husi kiak, iha aspetu hotu-hotu,” Xefe Estadu apela.

(Jornalista: Xisto Freitas)

(Editór : Manuel Pinto)

HUSIK IDA HATÁN