Uma Amérika Planea Enkaixa IELTS

0
176

DILI, (TATOLI) – Koordenadór Uma Amérika, Ezaquiel Ribeiro, informa ba ajénsia TATOLI, iha nia kna’ar fatin Kampus Resende, ohin katak tinan ne’e planu Uma Amérika (UA) nian mak sei reforsa liutan inglés.

Iha atividade lubuk ida mak planu ona, sei kontinua nafatin enkaisa ho adultu nian liuhusi preparatóriu. Tanba preparatóriu foin lalais UA serbisu hamutuk ho Bill, English Fellow, husi Estadu Unidu Amérika hodi prepara joven sira ne’ebé mak prontu ona atu bele foti IELTS (International English Language Testing System) test.

“Ami espera katak liuhusi IELTS Test, sira bele hetan oportunidade hodi estudu, kontinua sira-nia estudu iha estranjeiru”, hateten Ezaquiel Ribeiro.

Hatutan UA mós sei kontinua nafatin programa Coffee Chat ho língua inglés. UA tenta atu konvida nafatin Guest Speaker (oradór vizitante) sira husi nasaun li’ur liu-liu husi Estadu Unidu ne’ebé mak mai vizita Timor.

UA bele halo programa iha ne’e hamutuk ho sira atu nune’e fahe koñesimentu ne’ebé sira iha, matenek ne’ebé sira iha ba estudante sira iha UNTL, universidade sira seluk atu sira mós bele aprende buat ruma la’ós de’it ho inglés maibé mós koñesimentu sira ne’ebé ema bele fahe ba sira.

Husi Coffee Chat ne’e iha buat rua ne’ebé mak partisipante sira bele aprende, primeiru koñesimentu, segundu mak língua inglés.

“Ami mós iha planu atu halo nonton filme iha ne’e, nobar (nonton bareng). Ida ne’e, filme sira ne’ebé ma kami seleksi tuir pilár Uma Amérika ninian, tuir ko-programa Uma Amérika nian. Ida ne’e mak ami sei tenta”, haktuir.

Nune’e mós promosaun edukasaun USA (United States of America) ninian; foin lalais halo programa ida oinsá mak atu espalla informasaun oinsá mak ema bele aplika ba bolsu estudu nomós aplika bolsu estudu liuhusi website sira ne’ebé mak iha.

Hatene katak iha Estadu Unidu ne’ebá ne’e Universidade barak mak oferese sira-nia bolsu estudu diretamente ba estudante sira hodi bele aplika direta ba universidade ida ne’ebé mak prontu atu fó bolsu estudu.

Iha mós programa kultura ninian, festival  sei kontinua no programa sira seluk. Koordenadór Uma Amérika katak tan kritéria IELTS test mak ema ne’ebé aplika tenke iha koñesimentu báziku inglés. UA sei fó tuir kritéria. Iha fulan ida ka rua, nia bele aprende, UA ho English Fellow bele akompaña sira, ho mós LELI  (Lorosa’e English Language Institute) atu bele akompaña mós sira atu prepara hodi bele tuir IELTS.

UA mós iha programa IELTS online, koko atu kontinua fila fali online calls espesialmente ba IELTS ninian ne’ebé mak tinan kotuk iha ona atu ema sira ne’ebé la iha oportunidade atu tuir iha LELI, sira mós bele aprende ho gratuita. Foti IELTS test ne’e buat ida ne’ebé kustu karun tebes.

“Ita mós fó alternativu ba labarik sira seluk atu bele aprende liuhusi online  de’it. IELTS test  Ida ne’e ba adultu sira, ba sese de’it bele applay”, tenik.

Problema Eletrisidade

Koordenadór Uma Amérika katak iha loron hirak kotuk eletrisidade mak sai problema ida ba Uma Amérika tan eletrisidade ne’e mak problema boot ida iha UNTL (Universidade Nasionál Timor Lorosa’e).

La’ós de’it iha UNTL, iha instituisaun seluk mós, ida ne’e problema prinsipál ida ne’ebé sempre hasoru.

“Ha’u ko’alia ho sira universidade, husi parte lojísitika nian sira mós hateten, ne’e la’ós de’it uma Amérika maibé UNTL tomak enfrenta problema hanesan”, dehan.

Bainhira hetan fallansu eletrisidade iha loron hirak liubá mekanizmu ne’ebé koordenadór ne’e halo mak kontaktu kedas ho parte lojístika UNTL nian nune’e UA bele realiza nia atividade hanesan babain.

“Husi lojístika sira hateten katak sei iha problema lubuk ida ne’ebé presiza dezenvolve atu nune’e eletrisidade bele la’o di’ak liutan hodi bele fó benefísiu ba ema sira ne’ebé mak mai uza Uma Amérika, institituisaun sira seluk ne’ebé mak iha UNTL nian laran”, haktuir.

Fontes ne’e hatutan tan jeralmente jestaun iha UA la’o no tinan ne’e atu bele garante jestaun UA la’o di’ak liutan sira tenta ona buka ema hodi fó kapasitasaun ba sira.

“Mekanizmu seluk mak ami sempre buka ema atu halo kapasitasaun, tinan ida ne’e ami sei iha señor Scoot husi American Spaces Southeast Asia nian, nia baze iha Indonézia, sei mai fó treinamentu ba voluntáriu sira hodi hasa’e kualidade serbisu ita nian hodi serbi públiku sira”, konklui.

Jornalista: Rafy Belo

Editora: Rita Almeida

HUSIK IDA HATÁN