TransNusa Seidauk Sai Entidade Legál

0
92
Transaporte aereo husi Indonézia, Transnusa Aviation Mandiri ka naran badak Transnusa ho númeru 72-600, ohin halo aterajen iha aeroportu internasionál Nicolau Lobato Komoro. Foto Egas Cristovão

DILI, (TATOLI) – TransNusa seidauk sai entidade legál ida iha Timor-Leste no hetan sertidaun rejistu komersiál, maibé hala’o ona nia atividade komersiál iha nasaun ida ne’e, nune’e sei hetan multa U$5000.

Diretór Ezekutivu Servisu Rejistrasaun no Verifikasaun Emprezariál (SERVE), Florêncio Sanches, hatete tanba seidauk hetan legalidade maka kompañia ne’e hakarak atu kumpri saida mak lei haruka bainhira simu delegasaun ofisiál ida husi Indonézia ne’ebé reprezenta TransNusa iha semana kotuk, tanba sira rona no haree iha jornál katak sira seidauk sai entidade legál.

“Entaun kompañia boot ne’e hakfodak katak ita bá iha ne’ebá ema dehan ita seidauk kumpri lei sira, como sira konfesa buat ne’e di’ak mai ita nu’udar Governu ida, ha’u tenke hatán no obrigadu tanba iha finál imi rona informasaun sira ne’e no hakat mai iha ne’e”, relata Diretór Ezekutivu SERVE iha Matadouru, ohin.

Tanba aviaun ne’e opera tiha ona sein hetan rejistu komersiál, tuir dekretu lei 16/2017, artigu 14 hatete se kompañia internasionál ruma mai halo ona operasaun iha Timor-Leste sein rejista sei kona penalidade to’o dólar 5000.

“Ha’u hatete ba sira ida ne’e laiha buat ida, maibé naran katak buat ne’e hakerek iha lei. Ida ne’e hatudu mai ita katak ema sira ne’e hakarak halo negósiu tuir lejislasaun ne’ebé iha, como sira hatudu tiha ona laran-luak, tanba kooperasaun Governu rua asina husi Ministériu Negósiu Estranjeiru Timor-Leste no Indonézia iha juñu tinan hirak liubá hatete área transporte aéreu nian nasaun rua bele halo ba malu”.

Maibé antes atu halo, kumpri uluk lai lejislasaun rai ida nian no liu tiha fulan tolu, Ministru Transporte no Komunikasaun Timor-Leste iha tempu Pedro Lay nian asina tan akordu ho Indonézia atu kumpri lei sira.

“Regra sira tau tiha ona, maibé ita sira iha terrenu mak lakohi kumpri, ne’e la’ós kulpa ministru, Governu, Estadu nian, maibé kulpa tékniku nian ne’ebé lakohi pasa informasaun ne’e ba sira no sira rasik lamenta ida ne’e no dehan karik ami hatene buat ne’e uluk kedan ami hakarak halo”.

Tanba hala’o tiha ona nia atividade maka kompañia ne’e kona ona multa no husu atu halo rekursu tanba lei fó dalan, SERVE labele hapara nia atividade, maibé regula de’it enkuantu kompañia sira inklui Silk Air lakohi viola lei mas kazu ida ne’e kontinua akontese no antes ne’e aviaun Citilink mós la rejista.

“Akontese tanba ami sira reguladór. Halo enkontru mós ho aviasaun sivíl liu dala ida, tempu sestu Governu mós halo, ha’u esplika lei mak ne’e, aplika ba mas tanba sá informasaun lato’o ba ema sira ne’ebé iha karik tutela ba, maibé konforme emprezáriu sira konfesa katak sira lasimu informasaun ne’e, ne’e la’ós kulpa SERVE nian, SERVE labele intervein ba aviaun sira, maibé intervein liuhusi regulamentu”.

Enkuantu TransNusa hetan ona dokumentu ofisiál husi Estadu ida ne’e, maibé kompania ne’e seidauk hetan rejistu iha Timor-Leste.

Jornalista: Maria Auxiliadora

Editora: Rita Almeida

HUSIK IDA HATÁN