Traballadór Timoroan Ilegál Iha Korea Ho Porsentu 27

0
257
Traballadór timoroan . Foto/Google.

DILI, (TATOLI) – Sekretáriu Estadu Juventude no Traballu (SEJT), Nívio Leite Magalhães, hatete bazea relatóriu ne’ebé simu katak pesentajen traballadór timoroan ne’ebé konsidera ilegál iha Korea ho porsentu 27.

“Tanba ne’e mak iha despedida ho traballadór sira ha’u sempre hatete ba sira no ohin mós iha despedida ho traballadór na’in-14 bá Korea, ha’u hatete ba sira sei laiha mós toleránsia ba traballadór timoroa bá iha ne’ebá sai ilegál tanba sira bá la’ós lori ida-idak nia naran de’it, sira bá reprezenta nasaun”, Nívio dehan iha Kaikoli, ohin.

Nívio esplika prosesu sai traballadór ilegál ne’e tanba serbisu-na’in sira husi Timor-Leste bá Korea atu bá serbisu iha fábrika, maibé to’o iha ne’ebá lahalo serbisu fali iha fatin ne’e.

“Sira hili bá fali fatin seluk. Ida ne’e labele akontese, tanba ne’e mak bá oin ha’u fó ona instrusaun ba diretór sira atu koordena ho Korea nian para buka atu rezolve problema ne’e”.

Aleinde ne’e buka atu kontaktu ho embaixada Timor-Leste iha Korea, serbisu ho instituisaun relevante iha Korea atu identifika no buka hatene timoroan ilegál iha nasaun ne’e hodi halo esforsu atu haruka fila mai Timór.

“Tanba bainhira sira ilegál ne’e Governu labele kontrola sira iha ne’ebá no sira mós laselu taxa signifika ba sira-nia aan ne’e di’ak tanba sira simu osan tanba bele boot liután, maibé ne’e mós risku boot bainhira buat ruma akontese ba sira Governu labele proteje sira liuliu iha sira-nia serbisu fatin tanba ita rekoñese sira hanesan ilegál”.

Traballadór ne’ebé serbisu iha Korea no Austrália Governu sei kontinua tau matan ba sira tanba sira husik hele família atu serbisu hodi kontribui ba ekonomia família nian.

“La’ós sira bá atu sai fali ilegál iha ne’ebá depois ema detein sira tama komarka ne’e labele. Tanba ne’e mak SEJT sei halo esforsu hotu atu komunika ho embaixada Timór nian iha Korea hodi buka solusaun ba ida ne’e no sira ne’ebé ilegál ne’e halo moe ita-nia nasaun iha ne’ebá tanba persentajen ne’e boot no ema ko’alia timoroan laiha dixiplina no responsabilidade. Ne’e impaktu negativu ba ita-nia nasaun no kuota ne’ebé tinan-tinan Korea fó mai ita”.

Bá oin sei laiha toleránsia ba traballadór ilegál tanba sira-nia hahalok sei implika ba kuota ne’ebé fó mai Timor-Leste no sei estraga Timór nia naran iha Korea no sei fó sansaun grave ba timoroan ne’ebé sai atu bá serbisu liuhusi programa ida ne’e, maibé to’o iha ne’ebá abandona sira-nia serbisu fatin.

Jornalista: Maria Auxiliadora

Editora: Rita Almeida

HUSIK IDA HATÁN