Traballadór Ilegál Na’in 8 Servisu Iha Jerota

0
127
Komandante ba Departamentu Operasionál Servisu. Migrasaun, Inspetór Polísia, Fortunato Guterres. Foto/Egas Cristóvão.

DILI (TATOLI)—Servisu Imigrasaun  liuhosi programa inspesaun rotina deteta tan sidadaun estranjeiru na’in 8 hala’o servisu ho ilegál (la iha vistu servisu) iha kompañia Jerota Unidos Unip, Lda, iha Same hodi  halo konstrusaun ba igreja Nossa Senhora do Rosário de Fátima.

Traballadór ‘Mate Klamar’ na’in 8 ne’e tuir Komandante ba Departamentu Operasionál Servisu Migrasaun, Inspetór Polísia, Fortunato Guterres, mesak sidadaun indonézia ne’ebé halo serbisu iha Timor-Leste sein autorizasaun ka lahó vistu traballu nian, iha kompañia Jerota, durante fulan rua ona, hahú hosi Novembru ate Dezembru tinan kotuk, maibé foin mak parte imigrasaun deteta.

Trablladór husi indonésia ne’ebé lahó vistu traballu. Foto/Egas Cristóvão.

 “Ita hatete serbisu imigrasaun fiskaliza iha Dili laran loroloron no iha munisípiu tanba falta rekursu entaun hetan apoiu husi komandu munisípiu sira para bele identifika ema estranjeiru sira ne’ebé mak serbisu lahó autorizasaun ofisiál”, dehan Fortunato iha edifísiu Ministériu Interiór, ohin.

Nia dehan parte ne’ebé imigrasaun deteta kontra regulamentu servisu imigrasaun nian númeru 9/2003 no 11/2017 katak sé mak halo atividade ne’ebé sein autorizasaun ofisiál sei hetan sansaun ba nia atividade.

“Ba traballór sira ne’ebé kontra infrasaun lei servisu imigrasaun nian sei aplika sansaun ba ema ne’ebé halo serbisu lahó autorizasaun, nó mós kompañia ne’ebé halo serbisu laiha autorizasaun signifika fó serbisu ba ema estranjeiru laiha vistu traballu no ema estranjeiru ne’ebé halo atividade profisionál ba konstrusaun sivíl ka komérsiu, ida ne’e iha sansaun ne’ebé aplika ba sira tuir regulamentu”.

Sansaun ne’ebé aplika hosi imigrasaun, ba kompañia sei selu koima tuir lei imigrasaun númeru 11/2017, artigu 143, 144 ko’alia katak ema independenti ida mak halo serbisu sei aplika koima dólar 1000.

Kuandu empreza ne’e la kumpre infrasaun ba koima ne’ebé aplika maka sei voluntária abandona no dentru loron 10 traballadór sein vistu traballu tenke sai husi Timor-Leste no sei bandu atu labale tama fali mai Timor-Leste tuir lei nia hakarak ho duransaun ne’ebé lei hatete mínimu tinan rua.

Ba Traballadór ‘Mate Klamar’ na’in-ualu ne’e prepara hotu ona bainhira hato’o proposta ba diretór jerál no hein despaxu, bainhira traballadór sira la-kumpre infrasaun aplika voluntária abandona no bandu sei latama Timor-Leste.

“Kompañia sira ne’ebé la-kumpre koima no infrasaun tuir lei iha dalan seluk mak ami sei servisu hamutuk ho SEJT, SERVE no Impostu, sei envia karta ida ba sira katak kompañia ida ne’e kontra regra no bele difikulta nia. Nia kompañia timoroan nian se hakarak kontribui ba dezenvolvimentu atu la’o ho di’ak tenke tuir regulamentu ne’ebé mak vigór”.

Diretór Kompañia Jerota Unidos Unip. Lda, Fernando da Costa, esplika antes traballadór sira halo serbisu, nia parte fó hatene tiha ona ba sira (mate klamar sira) kona-ba lei ne’ebé vigor no husu sira atu prepara dokumentu para bele trata vistu traballu, maibé sira na’in 8  la-entrega.

Diretór Kompañia Jerota Unidos Unip. Lda, Fernando da Costa.

“Tanba ha’u lakohi halo atrazu ba serbisu, sira mai buka serbisu, prontu ha’u hatama sira no ha’u esplika antes ona, ha’u fó serbisu imi, maibé imi tenke prepara lalais dokumentu para ha’u halo vistu traballu para serbisu laiha buat ruma no durante tinan ida hafoin prolonga”.

Ba violasaun ne’ebé parte imigrasaun deteta ona, Fernando da Costa, nu’udar obra na’in prontu atu kumpre lei. Maski durante servisu traballadór sira ho kompañia iha dezentendimentu hodi keixa ba malu ba administradór postu no komandante polísia eskuadra Alas no Komandu Munisípiu Manufahi katak kompañia laselu no hahán ba sira laiha.

Antes ne’e mós Servisu Imigrasaun iha operasaun rotina ne’e deteta traballadór mate klamar na’in 32 maioria mai hosi ema Indonézia iha Munisípiu Baukau ho Dili

(Jonalista : Maria Auxiliadora)

(Editór : Manuel Pinto)

HUSIK IDA HATÁN