TL Sei Uza Kabu Submarinu Ba Telekomunikasaun

0
513
Ekipa Telin (Telkom International) ho Primeiru-Ministru, Marí Alkatiri. Foto GPM/Samuel

DILI, (TATOLI) – Ekipa Telin (Telkom Internationál) informa ba Primeiru-Ministru, Marí Alkatiri, katak kompañia ne’e hakarak halo investimentu kabu submarinu, nune’e sei hein aprovasaun husi governu atu implementa iha tempu badak.

“Ami mai hasoru Primeiru-Ministru no hakarak investe kabu submarinu iha Timor-Leste (TL), agora ami hein lisensa husi governu, se governu fó ona lisensa iha fulan ne’e ka fulan oin projetu ne’e sei remata iha agostu 2018”, tenik Chief Executive Officer (CEO) Telkomcel, Yogi Rizkian Bahar, ba jornalista sira hafoin hasoru Xefe Governu iha Palásiu Governu, ohin.

Hodi dehan Telin iha ona kabu submarinu iha Atambua (Indonézia) no sei dada direta mai Timor-Leste. Nune’e presu internet sei baratu bainhira implementa ona projetu ne’e.

Antes ne’e ekipa Telin hasoru ona ho Prezidente Autoridade Nasionál Komunikasaun (ANC), António Correia no Vice Ministru Obras Públika, Transporte no Telekomunikasaun, Inácio Moreira, Ministru Adjuntu Primeiru-Ministru ba asuntu Governasaun, José Reis no ikus mak enkontru ho Xefe Governu.

“Resposta husi Primeiru-Ministru di’ak tanba Timor-Leste presiza tan investimentu. Ami espera investimentu ne’e bele implementa iha tempu badak”, katak.

Governu anterior antes ne’e iha ninia programa, kompromisu atu reforma telekomunikasaun ba fibra óptika terrestre no kabu submarinu ba rede nasionál no rede internasionál. Realidade iha Timor-Leste maka sei kontinua depende ba ligasaun satélit ba internet ne’ebé la satisfás ona ezijensia iha sistema telekomunikasaun modernu nian. Nune’e, atu benefisia rede globál telekomunikasaun, presiza hetan asesu ba kabu submarinu ida. Maibé infelizmente seidauk bele implementa.

Telekomunikasaun satelit. Foto: espesial

Vantajen uza telekomunikasaun satélit mak halo área kobertura luan husi nasionál, regionál no globál nomós velosidade asesu ne’ebé aas no bandwith (valor konsumu transferénsia dadus per segundu) ne’ebé adekuadu maibé iha mós ninia defisiénsia mak presu ne’ebé aas ba internet no sensitivu ho klima liu-liu udan.

Enkuantu kabu submarinu hanesan kabu ne’ebé iha tasi okos atu halo koneksaun telekomunikasaun. Kabu modernu agora dadaun uza teknolojia fibra óptika atu lori dadus dijitál nomós dadus telefone, internet no dadus privadu.

Telekomunikasaun Kabu submarinu uza Fibra óptika. Foto espesial

Fiber óptika hanesan kabu ida feitu husi vidru ka plástiku ne’ebé kiik no mihis loos kompara ho kabu seluk. teknolojia ne’e normalmente uza ba rede komputadór hanesan tranformadór dadus. Maske kabu ne’e kiik maibé bele transforma dadus lalais liután kompara husi seluk.

Jornalista: Julia Chatarina

Editora: Rita Almeida

HUSIK IDA HATÁN