Timor-Leste Presiza Lei Ba Polítika Dezenvolvimentu Industriál

0
82
Diretór Jerál Indústria no Kooperativa, António da Costa.

DILI, (TATOLI) – Diretór Jerál Indústria no Kooperativa, Ministériu Komérsiu no Indústria (MKI), António da Costa, hatete Timor-Leste presiza lei kona-ba polítika dezenvolvimentu industriál nian nune’e hafasil atu halo kontrola ba atividade ne’ebé liga ba indústria nian. Ho ida ne’e maka ministériu prepara ona esbozu lei atubele diskute ba dahikus nian iha fevereiru hodi lori ba Konsellu Ministru.

“Polítika ne’e iha tanba aspetu hotu-hotu liga ba indústria. Indústria la’o ema nia moris adianta bá oin entaun buat hotu ita halo tenke sai produtivu, tanba ne’e presiza regra ruma ne’ebé mak atu regula kada atividade ne’ebé bele fó benefísiu ba ema hodi fortifika ekonomia Timór nian, ita presiza tebes atu kria polítika indústria ida”, katak António iha Bebora, Dili, ohin.

Polítika indústria foun ida ne’e halo tanba indústria rasik seidauk iha lei ida atu regula kada atividade industriál no daudaun ministériu sei uza hela regulamentu antes iha tempu UNTAET nian hodi halo kontrola, uza lei subsidiária ne’ebé la relevante ona ho kondisaun agora nune’e presiza hadi’a.

“Atividade industriál ne’e atu halo ema iha nasaun ne’e moris di’ak no bele mós iha nia impaktu negativu, entaun presiza tau regra atu regula ida ne’ebé bele halo ba ema hotu nia di’ak no prevene ida ne’ebé labele halo”.

Tanba ne’e iha ona esbosu lei industriál no hein de’it aprovasaun husi Konsellu Ministru hodi aprova sai lei ida hodi regula atividade industriál, maibé antes aprovasaun, iha fevereiru MKI sei halo semináriu ida kona-ba lei ida ne’e hodi konvida ministériu relevante no universidade, emprezáriu hodi fó hanoin (input) ruma hodi bele kompleta liután lei ne’e tanba operadór sira mak empreza no hanesan autór ba setór indústria tanba ministériu hanesan reguladór ida oinsá atu haree buat hotu la’o tuir ema no nasaun nia hakarak.

“Atividade industriál ne’e hahú husi ki’ikoan to’o boot ita presiza tau nia regra tanba regra ne’e atu regula atividade iha risku no aas no ki’ik. Ita bele uza mós lei balun ministériu relevante hanesan saúde, rekursu naturál, ambiente, iha ona regulamentu iha ne’ebá mós ajuda, maibé ita presiza lei indústria rasik atu fasil halo kontrola no ema ida-idak bele hatene indústria ne’e la’o tuir nia orden ne’ebé iha”.

Diresaun Nasionál Indústria no Kooperativa tau ona iha planu mensál nian no posibilidade iha fulan oin sei halo semináriu atu diskute ikus liu.

“Karik ida ne’e mak bele hatudu ona nia rezultadu di’ak para bele lori bá iha Konsellu Ministru atu nune’e aprova no bele uza ona lei ne’e para ajuda tékniku sira halo serbisu”.

Jornalista: Maria Auxiliadora

Editora: Rita Almeida

HUSIK IDA HATÁN