Timor-Leste Hetan Kontaktu Kultura Liuhosi Kooperasaun Ho KOICA

0
63

DILI, (TATOLI) – Liuhosi kooperasaun entre Timor-Leste no Ajénsia Kooperasaun Internasionál Korea (KOICA – Korea International Cooperation Agency), konsege hetan kontaktu kultura liuhosi formasaun ne’ebé fó ba funsionáriu husi Diresaun Nasionál Protokolu Komunikasaun Sosiál (DNPKS), Ministériu Administrasaun Estatál (MAE) nian.

Diretór Jerál Kooperativu, Edgar Sequeira Martins, hateten MAE liuhosi DNPKS iha tinan kotuk liubá asina akordu ho KOICA atu halo kooperasaun hodi hasa’e koñesimentu no kapasidade funsionáriu, loloos remata iha novembru tinan kotuk maibé tanba atrazu iha servisu foin mak bele realiza seremónia entrega servisu ne’e.

“Durante interasaun tinan ida ho balun iha ona kontaktu entre kultura Timor-Leste no Korea ho tulun señor ne’ebé fahe ninia matenek kolega sira bele hetene liután kultura Korea no ba señor ne’e bele sai referénsia ba ninia kareira”, tenik ba jornalista sira iha edifísiu MAE, ohin.

Pessoál husi KOICA ne’ebé servisu voluntáriu durante tinan ida ho balun fó formasaun ba funsionáriu DNPKS iha área komunikasaun sosiál  no informátika, alende ne’e fó mós ekipamentu hanesan komputadór neen, laptop ida, kamera filmajen ida, meza lima no kadeira 10.

Edgar hatutan durante serbisu hamutuk identifika presiza tan apoiu ekipamentu balun no halo manutensaun ba edifísiu DNPKS. Alende ne’e iha bolsu estudu ba funsionáriu balun ba Korea no formasaun lubuk ida ne’ebé KOICA fornese ba MAE.

“Agradese no aproveita tebes ho apoiu sira ne’e, apoiu ne’e sei kontinua hodi reforsa relasaun entre MAE no KOICA”.

Iha fatin hanesan Country Director KOICA, Kyungmoo Jun, hatutan atu dezenvolve nasaun ida ne’e presiza governu ne’ebé di’ak, transparénsia no rekursu ne’ebé matenek no liuhosi kooperasaun ne’e espera katak MAE bele hala’o servisu di’ak liután no bele iha amizade di’ak ho KOICA.

Hodi dehan tan MAE hanesan ministériu importante husi ministériu seluk tanba bele hadi’a ekonomia iha nasaun Timor-Leste.

“Espera tinan sanulu mai Timor-Leste bele dezenvolve di’ak liután, karik presiza buat ruma ka informasaun ruma KOICA sei ajuda”. 

Jornalista: Julia Chatarina

Editora: Rita Almeida

HUSIK IDA HATÁN