‘Tenta’ Involve Reuniaun Konsellu Estadu, Protokolu Bolu Sai Deputadu KHUNTO

0
1948
Deputadu bankada partidu Kmanek Haburas Unidade Timoroan (KHUNTO), José Agostinho (imajen hamriik iha oin).

DILI, (TATOLI) – Protokolu Prezidénsia Repúblika, kuarta ne’e iha Palásiu Prezidente Nicolau Lobato bolu sai deputadu bankada partidu Kmanek Haburas Unidade Timoroan (KHUNTO), José Agostinho, hosi sala reuniaun Konsellu Estadu tanba tenta involve reuniaun membru Konsellu Estadu.

Reuniaun Konsellu Estadu partisipa de’it hosi membru Konsellu Estadu sira no Prezidente Repúblika atu buka solusaun ba asuntu importante Estadu no Nasaun nian.

Antes ne’e, protokolu fó espasu ba deputadu ne’e tama iha sala reuniaun tanba hanoin katak deputadu refere mós membru Konsellu Estadu ida. Maibé, hafoin konfirma ba lista membru Konsellu Estadu ne’ebé eleitu hosi Parlamentu Nasionál, afinál deputadu Agostinho la’ós membru.

Hafoin ne’e, parte protokolu bolu distintu deputadu refere hodi ba priénxe fali fatin seluk ne’ebé protokolu sira prepara ba bainaka sira.

Deputadu José Agostinho nia prezensa iha Palásiu Prezidente Nicolau Lobato hodi akompaña José dos Santos Naimori Bucar nu’udar membru Konsellu Estadu ne’ebé eleitu hosi Parlamentu Nasionál.

Membru Konsellu Estadu ne’ebé eleitu hosi Parlamentu Nasionál hamutuk ema na’in lima maka José Marcelino Cabral Belo, Aurora Ximenes, Virgílio da Costa Hornai, Virgílio Smith no José dos Santos Naimori Bucar.

Jornalista: Xisto Freitas

Editora: Rita Almeida

HUSIK IDA HATÁN