Tasi-Ibun, Valeta no Jardin Seidauk Iha Ema Atu Hamoos

0
40
Pesoál saneamentu dasa hela fo’er. Foto/Google.

DILI, (TATOLI) – Saneamentu Munisípiu Dili (SMD) preokupa tanba daudaun ne’e kontratu ba pesoál hamoos valeta, jardin no iha área tasi-ibun laiha ema atu hamoos fatin sira ne’e tanba iha tempu udan fatin sira nakonu ho lixu no mosu inundasaun.

Xefe Departamentu SMD, Domingos dos Santos Soriano, hatete kontratu remata iha loron 11 jeneiru ne’e no serbisu iha fatin sira ne’e daudaun paradu hela.

“La’ós paradu totál, maibé Governu buka meiu hela tanba haree ba orsamentu agora ne’e duodésimu karik ministériu relevante mak sira iha osan bele halo kontratu daudaun ba ita-nia traballadór hodi hala’o serbisu”, dehan Domingos iha Munisípiu Dili, ohin.

Hatutan tan: “Hahú ohin mak ema hamoos laiha tanba semana kotuk ema hamoos hela. Tasi-ibun, valeta no jardin seiduak iha ema para hamoos tanba kontratu paradu”.

Atu kontrata ema halo serbisu ne’e, Domingos dehan ne’e depende ba ministériu no orsamentu.

“Antes ne’e kompañia Labelai mak ka’er serbisu ne’e tinan ida depois kontratu hotu mai fali kompañia Caimaleqi, maibé fulan ida de’it remata iha loron 31 dezembru entaun ami-nia pesoál husi postu administrativu kontinua fali husi dia 2 to’o 11, agora kontratu mós remata tan tiha ona entaun serbisu ba parte tolu ne’e para hela”.

Enkuantu serbisu ne’ebé daudaun la’o hela mak atividade foti lixu no dasa estrada públiku no lixeira Tibar.

“Pesoál hamoos dalan públiku ho lere duut mós agora paradu tanba ami-nia mákina tesi du’ut to’o agora seidauk iha”.

Jornalista: Maria Auxiliadora

Editora: Rita Almeida

HUSIK IDA HATÁN