SNK Hahú Reverifika Dadus Projetu Ita Nia Rai

0
152
Edifisiu Sistema Nasionál Kadastru (SNK) iha Kintal-Boot. Foto: SNK

DILI, (TATOLI) – Sistema Nasionál Kadastru (SNK) hahú halo reverifikasaun nain ba rai hodi dijitaliza dadus hosi projetu ITA NIA RAI. Alvu ba projetu pilotu hosi Munisípiu Dili mak Postu Administrativu Nain-Feto.

“Ami halo reverifikasaun tanba dadus uluk foti iha projetu ITA NIA RAI agora muda fali ba sistema foun ho naran Sistema Nasionál Kadastru. Uluk bainhira ita foti dadus manuál, atu cek iha dadus susar maibé ho sistema ne’e fasíl atu cek dadus iha sistema”, tenik ekipa téknika SNK, Adriano Cruz, bainhira halo sosializasaun ba komunidade Suku Gricenfor kona-ba reverifika dadus ba SNK, foin lais ne’e.

Hodi esplika sistema foun ne’e bainhira atu cek dadus kona-ba rai ida bele klik de’it iha mapamentu sai ona dadus kompletu nune’e bainhira ema ka governu atu hola rai ne’e karik la susar no dadus rai iha teritótiu tomak sentraliza hotu iha SNK.

Projetu ne’e implementa ona iha munisípiu 13 no ba pilotu reverifikasaun iha munisípiu Dili ne’e hahú husi postu administrativu Nain-Feto, suku Santa Cruz, no Bemori ne’ebé kuaze remata ona, agora iha suku Gricenfor, Bidau Licedere, Akadirihun no ikus liu ba suku Lahane Orientál hodi taka postu administrativu Nain-Feto.

Reverifikasaun ne’e atu hatama deklarasaun foun kona-ba nain ba rai, hadi’a deklarasaun ne’ebé rejista ona no husu atu hasai deklarasaun ne’ebé rejistu ona atu hatama ba SNK.

Dokumentu ne’ebé presiza prepara bainhira halo reverifikasaun atu hatama dadus ba SNK mak kartaun eleitorál, Billete Identidade (BI), Passsaporte, Sertidaun Batizmu, Sertidaun RDTL, Sertifikadu komprovativu nu’udar nain ba rai, no deklarasaun husi nain ba rai, no númeru referénsia.

Nain ba rai bele ema ida hanesan individu ka grupu hanesan feen ho laen ka família tomak, bainhira ema ne’ebé nain ba rai laiha ona (mate), família bele aprezenta gia de óbitu hanesan evidénsia ka sekuandu ema ne’e sei iha mak hakarak troka naran nain ba rai tenke aprezenta komprovativu (surat kuasa) husi nain atuál.

Reverifikasaun iha munisípiu Díli hahú dadaun ona ba postu administrativu Nain-Feto iha kada sede suku husi ekipa téknika husi SNK hafoin sira entrega nota hodi lori fali ba edifísiu SNK, Av. Bispo de Madeiros, Kintal boot.

Hafoin halo referifikasaun, dokumentu husi projetu ITA NIA RAI sei dada no deklarante sei hein emisaun no  publikasaun provizóriu dokumentu rai.

Atendementu ba periúdu ne’e hahú husi 4 dezembru 2017 to’o 3 marsu 2018 no sei halo atendimentu loron ida nain 40 (dader 20 loraik 20), komesa dader to’o loraik oras servisu nian.

Sistema Nasionál Kadastru

Projetu SNK lansa iha loron 25 jullu 2014 iha edifísiu SNK,  Kintál Boot, husi eis Primeiru-Ministru, Xanana Gusmão, ho ninia omólogu Portuguez, Pedro Passos Coelho, hamutuk ho eis Ministru Justisa, Dionísio Babo.

SNK hanesan objetivu fó apóiu ba Governu atu kontinua ho implementaun regras konjuntu ne’ebé transparente ba regulasaun mekanizmu titularidade no transferénsia propriedade, proteje interesse propriotáriu tradisionál no proporsionadu ambiente sosiál no negósiu ne’ebé saudável, propísiu ba dame sosiál no investimentu nasionál no internasionál ekonomia timoroan.

Objetivu seluk husi implementasaun sistema ne’e atu dezenvolve, implementa  no manutensaun sistema simples, efetivu no téknikamente sólidu ho levantamentu sistemátiku no jestaun ba informasaun kadastrál relevante hotu ne’ebé apóiu prosesu rejistu propriedade no tributasaun patrimóniu.

Alende ne’e, konseisaun no implementasaun prosedimentu ne’e atu intensifika levantamentu kadastrál sistimátiku uluk nian no hadi’a kualidade informasaun (dadus rai) ne’ebé foti ona iha projetu ITA NIA RAI.

Nune’e mós atu kontinua apóiu dezenvolvimentu no konsolidasaun kuadru legál relativu ba regularizasaun propriedade rai nian.

Antes ne’e, iha loron 29 novembru 2011 iha seremónia tranzisaun husi projetu ITA NIA RAI ba Ministériu Justisa ninia kompeténsia ne’ebé reprezentante governu momentu ne’eba mak eis Ministra Justisa, Lúcia Lobato.

Enkuantu, projetu ITA NIA RAI hahú implementa husi USAID iha tinan 2008 ho hanoin atu hamosu programa levantamentu kadastrál ida ne’ebé bele haforsa no proteje direitu rai ba povu. Husi servisu ne’ebé koopera ho governu ne’e konsege halibur ona deklarasaun nain ba rai hamutuk 50.000 iha teritótiu tomak husi munisípiu 13.

Agora dadaun halo reverifikasaun iha teritóriu tomak atu dadus rai hirak ne’e bele dijitaliza iha SNK.

Jornalista: Julia Chatarina

Editora: Rita Almeida

HUSIK IDA HATÁN