SMD Husu Soe Lixu Iha Fatin

0
76
Lixu namkari iha dalan.

DILI (TATOLI)-Xefe Departamentu Saneamentu Munisípiu Dili (SMD), Domingos dos Santos Soriano husu ba komunidade atu soe lixu iha fatin lixu, no soe tuir oráriu, la’ós soe lekar arbiru de’it.

“Governu no ami-nia hakarak, sira tau lixu iha fatin ne’ebé prepara, maibé iha parte seluk sira prodúz tiha ona lixu no  la lori bá fatin ne’ebé prepara, sira soe lekar arbiru de’it konserteza ita ko’alia ambiente, saúde, loos duni bainhira ita lekar fo’er ambiente ladi’ak saúde mós la saudavel”,  katak Domingos iha Munisípiu Dili, ohin.

Nia dehan, durante ne’e SMD esforsu-aan hodi rekolla lixu ne’ebé prodúz, maibé abitante Dili seidauk komprende di’ak oráriu ne’ebé fó sai ona husi Governu katak lixu ne’ebé saneamentu ra’ut ona ne’e labele fakar tan no sei fakar hafoin loraik tuku 06:00 no 07:00 mak bele fakar para iha dadeer tuku 06:00 pesoál sira ne’ebé ra’ut hodi bá fakar.

“Oráriu ne’ebé Governu fó mak soe fo’er hahú tuku 04:00 madrugada to’o 07:00 dadersán, agora loja, restaurante sira-nian loke tuku 08:00, tuku 09:00, maibé ami ra’ut liu tiha ona mak sira foin hasai fali lixu mai tau iha sira-nia loja oin ou lori bá fakar iha fatin ne’ebé ami ra’ut tiha ona. Ida ne’e mak akontese agora daudaun iha sidade laran”.

Bazeia ba dekretu lei 33/2008, iha artigu 9, sé mak soe fo’er arbiru iha sansaun, maibé to’o agora Governu sei ko’alia no seidauk aplika tanba buat sira ne’e haree ba moris ema sira ne’ebé hela iha sidade liuliu ekonomia.

Balun ita bele prega sansaun ba nian, maibé nia ekonomia lemah (fraku) liu. Dala ruma ita-nia maluk barak mak fila-liman ho nia moris ne’ebé limitadu entaun ita ka’er kona, ita prega sansaun ho osan valór hanesan ne’e mak ita sei hanoin fali ba ida mak to’o agora Governu sei kria hela lei balun ko’alia kona-ba ida ne’e atu prega sansaun ba loja, ema, sidadaun ida ne’e hira? Ida ne’e sei prosesu hela seidauk aplika.

Ho ida ne’e SMD halo avizu ba loja, restaurante no tun bá iha xefe suku sira no aldeia no halo sirkulár ida hodi fahe ba sira atu habelar ba ema sira iha baze nune’e bele halo tuir orientasaun ne’ebé fó sai.

Maski nune’e, realidade hatudu to’o agora iha área balun maka laiha konxiénsia liu atu asegura sira-nia lixu ne’ebé sira prodúz. Maibé balun iha konxiénsia ona, tanba ne’e kestaun lixu depende ba rezidente sira bainhira iha konxiénsia signifika sira-nia lixu, bairru, no aldeia moos husi fo’er enkuantu lae, la’o iha fatin-fatin, lixu namkari no butuk hela no balun lá fakar iha lixu fatin.

“Ida ne’e mak ezemplu ida ladún di’ak hatudu ba ita ne’ebé hela iha sidade ida ne’e. Sidade Dili tanba lixu ne’ebé soe arbiru iha tempu udan boot halo inundasaun no fo’er namkari iha dalan públiku nó mós iha bairru sira”.

(Jornalista : Maria Auxiliadora)

(Editór : Manuel Pinto)

 

HUSIK IDA HATÁN