Sidadaun Estranjeiru Tenke Komunika Bainhira Movimentu

0
253
Foto : Guido Gusmão Goulart.

DILI (TATOLI) -Inspetór Polísia, Fortunato Guterres hateten, sidadaun estranjeiru sira iha Timor-Leste, iha devér komunika ba servisu imigrasaun konaba sira nian, movimentu sira durante iha Timor-Leste.

“Sidadaun Estranjeiru ida bainhira mai presta informasaun iha imigrasaun nia dehan hela iha Dili, maibé identifika nia halo movimentu ba distritu balun, nune’e nia iha devér halo komunikasaun ba imigrasaun konaba movimentu ne’e no lori dokumentu komprovativus hanesan pasaporte,” Komandante operasaun servisu imigrasaun, Inspetór Fortunato Guterres informa ba jornalista sira iha edifísiu imigrasaun Vila Verde, Tersa (09/01).

Komunikasaun, Tuir nia, atu asegura seguransa ba movimentasaun ema estranjeiru ne’ebé mai servisu iha Timor-Leste.

“Hakarak ka lakohi, atu muda husi fatin ida ba fatin ida nia tenke fó informasaun ba imigrasaun tanba imigrasaun halo kontrolu ba ema estranjeiru sira nia movimentu, tama, hela, no sai fali, no estranjeiru sira iha devér atu kumpre lei,” Komandante fó hanoin hodi kontinua esplika, objetivu movimentu estranjeiru informa ba imigrasaun tanba, imigrasaun mak autoridade ne’ebé toma konta ba ema estranjeiru sira.

“Servisu imigrasaun tuir lei atu monitoriza ema estranjeiru sira nia movimentu.”

(Jornalista: Julia Chatarina)

(Editór : Manuel Pinto)

HUSIK IDA HATÁN