Resposta Tarde Difikulta Treinadór Prepara Jogadór

0
99
Treinadór AS Ponta Leste, Edurado Pereira (faru matin hamriik klaran ho gravata).

DILI, (TATOLI) – Treinadór AS Ponta Leste (PL), Eduardo Pereira, hateten estrutura klube (PL) seidauk fó resposta kona-ba kalendáriu treinu. Kestaun ne’e difikulta treinadór prepara jogadór sira atu hasoru liga époka datoluk.

“Tanba jogadór sira ne’ebé maka ha’u haree ona atu hela nafatin iha Ponta Leste no jogadór balun ha’u atu bolu tan, maibé estrutura klube seidauk fó resposta to’o agora. Ida ne’e difikulta tiha ha’u atu prepara ba époka 2018”, dehan ba ajénsia Tatoli hosi nia kna’ar fatin via email, kinta ne’e.

Eduardo haktuir estrutura klube seidauk resposta tanba iha difikuldade ba orsamentu, mesmu estrutura klube mesak emprezáriu ne’ebé kaer projetu maibé governu seidauk selu projetu ne’ebé sira finaliza ona.

“Patrosinadór ne’e maioria ema sira ne’ebé kaer projetu. Sira fó apoiu ba klube ne’e osan mai hosi projetu entaun  sira mós hein hela sira nia osan atu sai maibé to’o agora governu seidauk aprova sira nia projetu ne’ebé sira finaliza ona. Entaun, araska oituan tanba sira selu jogadór ho ofisiál sira ne’e ho osan hosi projetu sira ne’e”, haktuir.

Hatutan tan bainhira preparasaun tarde, fó impaktu ba jogadór sira nia kapasidade hanesan estamina, fíziku, tátika no téknku.  Haktuir ezemplu, atu ezame iha eskola maka prepara lalais de’it, oinsá rezultadu ka valór.

Treinadór katak to’o agora seidauk rekontratu hosi PL tanba seidauk hetan kontaktu formalmente hosi klube.

“To’o agora ha’u rasik seidauk iha kontratu atu treinu hikas Ponta Leste. Iha klube balun hosi Segundu Divizaun ho Primeiru Dizisaun kontaktu beibeik ha’u maibé ha’u sei hein semana ida tan maka ha’u foti desizaun”, afirma.

Jornalista: Xisto Freitas

Editora: Rita Almeida

HUSIK IDA HATÁN