Reseita Husi SERVE Sei Tau Iha BNCTL

0
175
BNCTL Dili. Foto/Google.

DILI, (TATOLI) – Reseita hotu ne’ebé hetan husi Servisu Rejistrasaun no Verifikasaun Emprezariál (SERVE) sei tau iha Banku Nasionál Komérsiu Timor-Leste (BNCTL) inklui kustu ba lisensiamentu sektorál ho dólar 45 tanba SERVE labele diretamente simu osan husi kliente.

Diretór Ezekutivu SERVE, Florêncio Sanches, hatete daudaun ne’e SERVE iha ona prosesu atu hetan konta bankária, nune’e halo ona koordenasaun ho tezoreiru nasionál Ministériu Planu no Finansa no deside hatama pedidu ba ministru.

“Horisehik ha’u simu tiha ona informasaun katak despaxu tun ona no hatudu tiha ona BNCTL katak SERVE sei loke konta bankária atu nune’e BNCTL mak sei simu emolumentu sira ne’e. Depois simu karta ofisiál ida ne’e, ha’u sei hakerek karta ofisiál ba BNCTL atu nune’e loke nia kaixa oan ida iha SERVE laran. Infraestrutura ami iha tiha ona atu sira mai loke lalais iha ne’e atu simu ona emolumentu”, katak Florêncio iha Matadouru, ohin.

Enkuantu planu SERVE nian atu loke konkursu públiku tanba polítika SERVE nian atu apoiu setór privadu no labele hili diretamente.

“Kuandu lei ne’e (lisensiamentu sektorál) aplika iha loron 25, entaun tuir planu SERVE sei loke konkursu ba banku komersiál hotu iha Timór tomak. Rekizitu ida mak banku ida tenke iha sistema pagamentu online, sistema pagamentu online tenke komunika ba kada banku, nia tenke iha sukursál iha teritóriu tomak, ida ne’e mak kritériu atu nune’e sé sira ne’ebé lakumpri kritériu ne’e sei la liu”.

Maibé informasaun ne’ebé hetan katak BNCTL tanba nia asionista ne’e úniku Estadu Timor-Leste nune’e SERVE  prontu hala’o desizaun husi Minstru Planu no Finansa nian.

Jornalista: Maria Auxiliadora

Editora: Rita Almeida

HUSIK IDA HATÁN