Reseita APORTIL-Alfándega Millaun 7.93 Iha Tinan Ida

0
160
Osan Dolar Amerika

DILI (TATOLI)—Servisu Autoridade Protuáriu Timor-Leste (APORTIL) ho Servisu Alfándega kada tinan rekolla osan hamutuk millaun 7.93 dolar Amerikanu, hodi hatama ba kofre estadu.

APORTIL kada tinan konsege halibur osan millaun 3.93 Dolar Amerikanu, enkuantu Alfándega kada tinan koleta osan millaun 4 resin dolar Amerikanu.

Diretora Administrasaun no Finansas APORTIL, Demétria Seran hatete, iha tinan 2017, servisu APORTIL, Dili konsege halibur reseita millaun $3.93 hodi hatama ba kofre estadu.

Reseita hirak ne’e APORTIL rekolla husi ró ne’ebé atraka iha Portu Dili, bee mós, karreta no sasán sira ne’ebé rai iha Portu Dili no fasilidade seluk tan.

ʺReseita barak liu mai husi kampaña, sira selu APORTIL bainhira sasán sira rai ou tama iha portu Dili ho tempu kleur,ʺ Diretora Administrasaun no Finansas , esplika ba Ajénsia Tatoli, Sesta (12/01).

Nia dehan iha tinan 2016, APORTIL hatama osan millaun 4, no tinan 2017, fó tan osan hamutuk millaun 3.93, maibé espasu portu Dili la sufisiente tanba ne’e difikulta Ró sira atraka, nune’e dala barak Ró para de’it iha tasi laran.

“Ró demora iha tasi laran ne’e la’ós katak ami mak servisu ladi’ak, maibé espasu iha portu Dili ki’ik. Maski nune’e, APORTIL iha ona dry port iha Tasitolu, mézmu agora seidauk funsiona ho di’ak.”

Iha parte seluk, Presidente Komisaun E Parlamentu Nasionál, asuntu infraestrutura, Abel Pires reforsa  servisu Alfándega mós kada tinan hatama reseita millaun 4 resin dolar Amerikanu ba kofre estadu.

ʺMillaun 4 ba kobra hosi taxa,ʺ Deputadu, Abel reforsa, bainhira Nia ho ekipa Parlamentu Nasionál, halo fiskalizasaun iha Portu, ohin.

(Jornalista: Agapito dos Santos)

(Editór : Manuel Pinto)

HUSIK IDA HATÁN