Projetu Barak Seidauk Selu, CCI-TL Enkontru Ho PM

0
225
Primeiru Ministru, Marí Alkatiri.

DILI, (TATOLI) – Ekipa Kámara Komérsiu Indústria Timor-Leste (CCI-TL sigla portugés) hosi munisípiu 12 enkontru ho Primeiru-Ministru, Marí Alkatiri, hodi rona esplikasaun kona-ba projetu ne’ebé to’o agora seidauk iha pagamentu, nune’e bele hatutan ba emprezáriu sira.

Xefe Governu esplika dívida sira ne’ebé seidauk bele selu balun osan laiha duni no balun osan iha maibé sistema pagamentu mak la permite.

“Sira husu enkontru atu hetan esplikasaun tanbasá dívida sira seidau bele selu no ha’u esplika ba sira katak balun osan laiha duni, balun osan iha maibé sistema téknikamente la permite tanba fundu infraestrutura ne’e projetu multi anuál, soke sofware ne’ebé uza ba sistema seidauk adopta halo pagamentu multi anuál”, tenik PM jornalista sira hafoin enkontru ho membru CCI-TL iha Palásiu Governu, kinta, (11/1).

Kestaun ne’e, Governu propoin US$140 milloen resin atu selu dívida sira iha orsamentu retifikativu. Maské nune’e, iha 2017 fulan-novembru no dezembru nia laran antes taka anu fiskál, Governu dahituk konsege selu US$200 milloens resin ba projetu infraestrutura hanesan estrada, ponte, konstrusaun sivíl no seluk tan.

Parte seluk Prezidente CCI-TL, Oscar Lima, hateten nia ho ekipa mai hasoru Xefe Governu atu hetan esklaresimentu kona-ba pagamentu projetu sira.

“Ami mai aprezenta ami nia difikuldade no husu esklaresimentu prinsipál mak kona-ba pagamentu tanba, ami rona dala-barak ema dehan osan sei iha, entaun ami rasik tenke husu ba Primeiru-Ministru no membru Governu sira atu hetan solusaun ne’ebé di’ak”, tenik.

Nune’e nia dehan tan, lori ekipa husi munisípiu hotu para mai rona rasik hodi nune’e bele hatutan ba emprezáriu sira ne’ebé mak agora seidauk hetan pagamentu.

Tuir nia Governu iha responsabilidade nafatin atu selu no emprezáriu ne’ebé mak sei servisu kontinua servisu maibé problema agora mak balun tenke para servisu tanba osan rasik la to’o.

“Empreza ne’ebé kapitál la to’o nia tenke para halo projetu, nia atu ba deve iha ne’ebé?, ema atu fó deve mós tauk tanba osan demora liután no emprezáriu atu selu susar”, katak.

Nia katak osan ne’ebé mak Governu seidauk selu hamutuk US$240 milloen resin no nia hein Governu bele buka solusaun di’ak tanba se la’e emprezáriu nasionál barak mai sei lulun biti, laiha kbi’it atu kontinua servisu.

Jornalista: Julia Chatarina

Editora: Rita Almeida

HUSIK IDA HATÁN