Primeiru-Ministru Inagura Edifísiu KFP

0
142
Primeiru-Ministru loraik ne’e asina plaka ho símbolu inagura edifísiu KFP iha area Kaikoli. Foto Tatoli/Egas Cristovão

DILI, (TATOLI) – Primeiru-Ministru, Marí Alkatiri, loraik ne’e inagura edifísiu Komisaun Funsaun Públiku (KFP) ne’ebé lokaliza iha área Kaikoli.

ʺParabéns ba Komisaun Funsaun Públiku tanba iha edifísiu modernu ida, mesmu buat balun la di’ak maybe ha’u fiar empreza sei haree no parabéns ba funsionáriu públiku hotu tanba bele hetan atendementu ho dignidadeʺ, dehan PM iha ninia diskursu.

Konstrusaun ne’e gasta orsamentu Estadu ho valór US$5,637,224.44 durante tinan hitu liu. Konstrusaun dahuluk implementa hosi kompañia TLIC ho ninia konsorsiu iha 2011 ho totál orsamentu insisiál hamutuk US$3,315,704.20, maibé  la konsege finaliza.

Tanba ne’e iha fevereiru 2017 kompañia Karya Timor Leste kontinua konstrusaun hodi finaliza iha dezembru 2017 ho orsamentu millaun ida resin.

Alkatiri fiar ho edifísiu foun ne’e sei apoiu servisu funsionariu KFP hodi atende públiku ho di’ak liután

Kompañia nafatin assume responsabilidade hodi hadi’a fatin balun ne’ebé konvida udan ben tama ba edifísiu laran.

ʺHa’u apresia kompañia Karya Timor-Leste tanba bele halo hotu obra ne’eʺ, hatutan.

Alende ne’e husu ba Prezidente KFP atu kria ona dezeñu interior hodi kompleta instalasaun balun ne’ebé oras ne’e monta ona vídio vizilánsia (CCTV-sigla ingles) no seluk tan. Nune’e mós kria planu manutensaun ba edifísiu ne’e hodi asegura to’o tinan naruk. ʺEdifísiu ne’e di’ak maibe tenke halo kalku ba manutensaunʺ, dehan.

Prezidente KFP, Faustino Cardoso, hateten edifísiu ho andar tolu, luan metru-kuadradu 3,984 kompostu hosi andar okos sei uza ba arkivu, andar daruak sei uza ba sala servisu sei akumula funsionariu 200, sala konferénsia, sala auditóriu, sala formasaun informátika.

ʺHo inagurasaun ne’e, KFP sei hahú muda gradualmente hahú hosi diresaun sira mak durante ne’e funsiona hosi instalasaun iha ministériu administrasaun estatál no casa europeaʺ, dehan Prezidente KFP.

Jornalista: Agapito dos Santos

Editora: Rita Almeida

HUSIK IDA HATÁN