PR Simu Tan Karta Kredensiál Tolu

0
151
José Pedro Vieira Machado, Embaixadór Portugal ba Timor-Leste sei hametin liután kooperasaun. Foto midia PR

DILI, (TATOLI) – Prezidente Repúblika, Francisco Guterres Lú Olo, foin lais ne’e simu tan karta kredensiál tolu husi Embaixadór Estadus Unidus Amérika (EUA), Portugal no Koreia Sul, iha Palásiu Prezidensiál Nicolau Lobato.

Embaixadora dezignadu EUA, Kathleen M. Fitzpatrick, sei simu kna’ar nu’udar Embaixadora estraordináriu  no Plenipotensiáriu EUA iha Timor-Leste hanesan Prezidente EUA, Donald Trump anúnsia ona iha loron 19 jullu tinan kotuk.

Antes kna’ar ne’e asume husi Karen Clark Stanton nu’udar Embaixadora ba Timor-Leste iha loron 17 dezembru 2014 no aprezenta ninia karta kredensiál ba (eis) Prezidente Taur Matan Ruak iha loron 16 janeiru 2015.

José Pedro Vieira Machado hetan pozisaun diplomátika dahuluk nu’udar ambaixadór. Embaixadór Portugal ba Timor-Leste sei hametin liután kooperasaun entre nasaun rua ne’ebé iha relasaun sólida ho dimensaun istórika no konsidera nu’udar nasaun maun-alin.

Embaixadór José Pedro Vieira Machado sei hametin liután kooperasaun bilaterál iha área justisa, defeza, edukasaun, lian, obras públikas no finansa.

Nune’e mós Embaixadór Koreia Sul, Lee Chin Bum, mai husi karrera militár. Nasaun ne’e iha periodu tranzisaun iha administrasaun Organizasaun Nasoens Unidas (ONU) nia okos haruka unidade militár no estabelese relasaun diplomátika ho Timor-Leste iha 2002.

Iha tinan 2009 loke nia embaixada iha Dili no momentu ne’eba kedan Koperasaun Timor-Leste ho Koreia Sul sai metin liután husi tinan ba tinan iha área juventude, desportu, traballu no seluk tan.

Jornalista: Julia Chatarina

Editora: Rita Almeida

HUSIK IDA HATÁN