PR no MDS Deskuti Orsamentu Duo Désimu Ba F-FDTL no PNTL

0
114
Enkontru entre Ministru Defeza no Seguransa (MDS), José Agostinho Sequeira "Somotxo" no Prezidente Repúblika (PR), Francisco Guterres Lú Olo. Imajen Mídia Palásiu PR.

DILI (TATOLI)—Ministru Defeza no Seguransa (MDS), José Agostinho Sequeira “Somotxo” hala’o enkontru ho Prezidente Repúblika (PR), Francisco Guterres Lú Olo, hodi ko’alia kona-ba osan Duo Désimu ba forsa defeza no seguransa.

Prezidente Repúblika husu Ministru Defeza no Seguransa katak Orsamentu Duo Désimu ba instituisaun rua ne’e (F-FDTL no PNTL) sustenta to’o fulan hira.

“Ha’u justifika ba Xefe Estadu katak Duo Désimu ne’e ba Bens e Serviços (manutensaun ba kareta no hahan ba forsa rua ne’e) ho Saláriu no Vensimentu de’it. Laiha Kapitál Menór (sosa fasilidade sira),” Somotxo ko’alia asuntu ne’e ba jornalista sira iha Palásiu Prezidente Nicolau Lobato, Bairru Pité, Dili, tersa ne’e, hafoin enkontru ho Xefe Estadu Lú Olo.

Atu instituisaun funsiona di’ak, tuir Somotxo, tenke aperta sintu para instituisaun rua ne’e labele paradu. Maibé, nia dehan, prioridade barak maka sei la konsege realiza tanba osan laiha.

Governante ne’e esplika orsamentu Duo Désimu ba setór Defeza no Seguransa ho montante $6 miloens itál ne’ebé sei kobre ba fulan tolu ka haat nian.

Iha biban ne’e, Ministru Somotxo hatán ONG balun ne’ebé protesta medida seguransa iha Parlamentu Nasionál iha momentu halo deskusaun ba programa Governu no Orsamentu Retifikativu tanba tuir ONG ne’e katak ne’e hanesan presaun ida.

Tuir Somotxo katak Ministru Defeza no Seguransa iha kompeténsia tomak atu halo medida seguransa no ne’e simplismente medida seguransa prevensaun, la’ós hanesan ameasa ida. “Ita presiza garante seguransa iha ne’ebá atu instituisaun Estadu bele funsiona ho di’ak,” nia tenik.

(Jornalista: Xisto Freitas)

(Editór : Manuel Pinto)

HUSIK IDA HATÁN