PR Husu Tanbasá Plenária La La’o

0
531
Prezidente Parlamentu Nasionál, Aniceto Lopez Guterres, hala’o enkontru ho Prezidente Repúblika, Francisco Guterres Lú Olo. Imajen mídia Palásiu PR.

DILI, (TATOLI) – Prezidente Repúblika (PR), Francisco Guterres Lú Olo, husu ba Prezidente Parlamentu Nasionál (PN) tanbasá la realiza plenária iha segunda no tersa semana ne’e.

“Ne’e hatudu katak Prezidente Repúblika preokupa ho situasaun Parlamentu nian”, Prezidente PN, Aniceto Lopez Guterres hato’o ba jornalista sira iha Palásiu Prezidente Nicolau Lobato Bairru Pité, kuarta ne’e hafoin informa situasaun PN ba Xefe Estadu.

Aniceto haktuir plenária la la’o tanba laiha ajenda no realsa plenária halo ne’e atu trata ajenda maibé la’ós halo plenária nar-naran depois ida-idak hato’o deklarasaun polítika iha ne’ebá (PN) sein fundamentu.

“Ha’u labele inventa ajenda ne’e ho arbiru. Parlamentu ne’e órgaun lejizladór no fiskalizadór. Órgaun lejizladór signifika tenke aprova lei sira ne’e. Lei ne’e mai hosi Proposta Lei hosi Governu no inisiativu hosi deputadu sira, maibé to’o ohin loron inisiativu hosi deputadu sira laiha. Iha Proposta Lei Orsamentu hosi Governu maibé seidauk deskuti rejeita tiha ona”, esklarese.

Aniceto afirma la viola rejimentu tanba tuir hela mekanizmu normál. Katak, nia labele ajenda Mosaun Destituisaun hasoru Prezidente PN tanba prosesu sei la’o hela iha Tribunál. Aleinde ne’e, hatutan, nia mós haruka ona karta ba Governu iha 3 janeiru liu-ba nune’e bele mai iha PN atu hatán Mosaun Sensura, maibé to’o ohin loron Governu seidauk deside loron.

“Ha’u la hetan razaun ida forte atu obriga Governu bele ba lalais Parlamentu Nasionál iha 8 janeiru. Ne’e labele. Governu nu’udar órgaun soberania ketak ida, tan ne’e iha liberdade atu marka loron maibé labele liu prazu loron tolunulu hahú hosi loron ne’ebé Parlamentu Nasionál haruka karta ba Governu”, haktuir.

Jornalista: Xisto Freitas

Editora: Rita Almeida

HUSIK IDA HATÁN