PR Deside Disolve PN

0
500
Prezidente Repúblika, Francisco Guterres Lú Olo, ohin iha Palásiu Prezidente Nicolau Lobato Bairo Pité, deklara disolve Parlamentu Nasionál hodi hakotu impase polítika iha rai-laran. Foto António Goncalves

DILI, (TATOLI) – Prezidente Repúblika (PR), Francisco Guterres Lú Olo, sesta ne’e iha Palásiu Prezidénsia Repúblika,  Bairru Pité, ofisialmente deklara disolve Parlamentu Nasionál (PN) tanba kauza hosi krize institusionál.
Desizaun Prezidente Repúblika bazeia ba Konstituisaun artigu 86 aliña F ne’ebé hateten kona-ba disolusaun Parlamentu Nasionál bainhira mosu krize institusionál iha PN.

Lú Olo informa povu hato’o mensajen momoos katak polítiku sira presiza haklean liután demokrasia maibé polítiku sira la interpreta loloos povu nia mensajen ne’e no fila kotuk ba malu hodi hamosu krize institusionál.

Primeiru-Ministru, Marí Alkatiri, hakuak Ministru Komérsiu no Indústria, António da Conceição, hafoin Prezidente Repúblika deklara disolve Parlamentu Nasionál hodi hakat ba eleisaun antesipada. Foto António Goncalves

Tanba ne’e, Xefe Estadu dehan, labele kontinua situasaun polítika ne’e to’o loron naruk nia laran.

“Ita-nia Konstituisaun tatoli momoos katak povu maka na’in ba poder politiku. Ne’e duni, ho haraik an Prezidente Repúblika husu ba povu atu vota fila fali iha eleisaun antesipada atu bele rezolve dezafiu foun ne’ebé maka nasaun no povu oras ne’e daudaun enfrenta”, hatete Lú Olo.

Hafoin ne’e, Xefe Estadu afirma iha tempu tuir mai nia sei marka loron ba eleisaun antesipada.

Jornalista: Xisto Freitas

Editora: Rita Almeida

HUSIK IDA HATÁN