PN Seidauk Bele Diskute Lei Anti Korupsaun

0
59
Xefe Bankada Partidu FRETILIN, Francisco Miranda Branco. Imajen Mídia Palásiu PR.

DILI, (TATOLI) – Parlamentu Nasionál (PN) seidauk bele diskute Projetu Lei Anti Korupsaun tanba impaktu hosi situasaun polítika iha uma fukun.

“Ami atu aprezenta orojetu lei anti korupsaun nune’e bele diskute maibé la konsege tanba iha kontradisaun entre bankada CNRT, PLP no KHUNTO no bankada FRETILIN no PD”, Xefe Bankada Partidu FRETILIN, Francisco Miranda Branco, ba jornalista sira iha Palásiu Prezidente Nicolau Lobato Bairru Pité, kinta (11/1), hafoin hamutuk ho bankada PD hato’o boas entradas ba Prezidente Repúblika, Francisco Guterres Lú Olo.

Situasaun polítika ne’e, nia haktuir impede diskusaun atu altera Lei Xefe Suku tanba iha tinan ikus hosi mandatu Sestu Governu Konstitusionál deside halakon subsídiu ka seña prezensa Konsellu Suku. Tan ne’e nia dehan atu introdus fila fali para Konsellu Suku sira iha direitu simu seña prezensa.

Francisco Branco hateten Komisaun Temátika sira iha PN dezde hahú funsaun iha Kuarta Lejizlatura la funsiona ho di’ak tanba deputadu sira influensiadu ho Mosaun Sensura, Mosaun Rekursu Ba Orsamentu Retifikativu no Mosaun Destituisaun Prezidente Parlamentu Nasionál.

“Bele halo polítika hatún malu maibé prioridade ba Nasaun no Estadu maka povu nia moris. Povu nia moris maka orsamentu”, katak.

Jornalista: Xisto Freitas

Editora: Rita Almeida

HUSIK IDA HATÁN