PM Husu KFP Rezolve Funsionáriu “Mate Klamar”

0
467

DILI, (TATOLI) – Primeiru-Ministru (PM), Marí Alkatiri, husu ba Komisaun Funsaun Públika (KFP) atu rezolve kestaun funsionáriu “Mate Klamar”. 

“Ema mate ona la’ós ninia sala, ita moris ne’e mak sala”, katak xefe governu konstitusionál da-hitu ba jornalista sra, bainhira inagura edifísiu foun KFP iha Kaikoli, kuarta ne’e.

Solusaun di’ak atu hadi’a situsaun ne’e mak hadi’a sistema. “Tenke iha inter face (entre oin ho oin) entre funsaun públika ninian, ho free balance, ho sistema pagamentu”, akresenta xefe exekutivu ne’e.

Prezidente KFP, Faustino Cardoso Gomes rekoñese iha duni frakeza balun iha KFP tanba ne’e ezije kreatividade no inovasaun oinsá hadi’a sistema iha KFP hamutuk ho Ministériu Planu no Finansa, nune’e iha sistema ida integradu kona-ba situasaun funsionáriu públiku ninian hodi evita situasaun; funsionáriu “mate klamar” no funsionáriu duplu; ema ida simu vensimentu dalarua.

Faustino esplika KFP agora hamutuk ho Ministériu Finansa, iha hela prosesu ida atu oinsá hadi’a sistema, hamosu interligasaun ou inter face entre KFP ho pay roll, iha ona dekretu ida, dekretu governu ninian, ne’ebé atribui kompeténsia ba iha Komisaun Funsaun Públika atu haree kona-ba lista funsionáriu sira nian i pay roll haree de’it ba pagamentu.

Durante ne’e, sistema ne’e, ministériu ida-idak dala balun ba diretamente liga ho pay roll, lori lista funsionáriu públiku ninian, halo atualizasaun mós lori diretamente ba iha ne’ebá sem liuhusi Komisaun Funsaun Públika; ne’ebé hamosu dala balun, lista funsionáriu Komisaun Funsaun Públika nian la hanesan ho lista funsionáriu públiku iha pay roll ninian.

“Tanba ne’e mak ba oin ita iha prosesu atu oinsá konsolida sistema interligasaun ida ne’e, klaru katak ho apoiu husi gabinete Primeiru-ministru, i ne’e hahú tiha ona iha sestu governu konstitusionál i ita sei kontinua nafatin hodi nune’e evita funsionáriu “mate klamar” ho funsionáriu dupla ne’e”, dehan prezidente KFP.

Demite Funsionáriu Saláriu Dupla

Kestiona kona-ba realidade iha duni ema mate ona sei simu nafatin saláriu, Prezidente KFP, Faustino Cardoso Gomes haktuir: “Iha, iha, atu dehan de’it iha. Hira ita seidauk hatene maibé iha”.

Iha mós simu saláriu dupla. Ba sira ne’ebé mak deteta KFP hola medida disiplinár. Ne’e akontese ona dezde tinan kotuk.

“Kuandu ida ne’e akontese, demisaun! Tanba nia (funsionáriu-red) simu dupla nia la fó hatene, labele! Kuandu komisaun investiga hetan evidénsia, nia halo duni”, prezidente KFP  fó atensaun.

Nia haktuir kazu seluk bele mai husi sira ne’ebé mak kaer sistema, bele iha prátika iregulár ba sira ne’ebé mak kaer sistema.

“Kuandu akontese, iha evidénsia Komisaun Funsaun Públika hola medida prosesu disiplinár”, salienta.

Jornalista: Rafy Belo

Editora: Rita Almeida

HUSIK IDA HATÁN