DILI, (TATOLI) – Xefe Bankada Partidu Libertasaun Populár (PLP), Fidelis Mahalhães, hateten tempu badak PLP sei deside atu sai pakote ida ho partidu CNRT no KHUNTO iha eleisaun antesipada.
“Ami sei deside iha tempu badak maibé imi (jornalista) hatene katak partidu tolu ne’e hamutuk nanis ona no sei sólidu liután”, katak Fidélis ba jornalista sira iha Palásiu Prezidente Nicolau Lobato, Bairru Pité, sesta ne’e, hafoin partisipa desizaun Prezidente Repúblika, Francisco Guterres Lú Olo, ba disolusaun Parlamentu Nasionál.
Nia informa, desizaun Prezidente Repúblika ba disolusaun Parlamentu Nasionál ne’e sira previstu tiha ona katak sei akontese disolusaun Parlamentu Nasionál hodi hakat ba Eleisaun Antesipada.
“Ita hotu tenke entrega fila fali ba iha povu hodi deside katak povu sei investe konfiansa ba ami ka lae. Se la fó konfiansa ona ba ami entaun laiha buat ida”, esklarese Fidélis.
Maibé, tuir nia hanoin katak povu sempre fó konfiansa tomak ba PLP tanba indikadór maka fou-foun bainhira PLP eziste de’it hetan tiha ona Kadeira ualu (8), satán agora. “Serteja katak PLP sei hetan kadeira barak iha eleisaun antesipada”, Fidelis.
Jornalista: Xisto Freitas
Editora: Rita Almeida
