PJR Relata Kazu Kriminalidade Ba PR

0
13
Enkontru entre Prokuradór Jerál Repúblika, José da Costa Ximenes no Prezidente Repúblika, Francisco Guteres Lú Olo. Imajen Mídia Palásiu PR.

DILI, (TATOLI) – Prokuradór Jerál Repúblika, José da Costa Ximenes, hala’o enkontru ho Prezidente Repúblika (PR), Francisco Guterres Lú Olo, hodi ko’alia kona-ba kriminalidade no funsionamentu Ministériu Públiku durante dezembru 2017.

“Iha dezembru nia laran pelumenus 300 itál prosesu maka entrada. Iha Dili iha kazu hamutuk 235 itál no restu ne’e hosi munisípiu sira. Ida ne’e maka situasaun balun kona-ba kriminalidade ninian ne’ebé halai liu ba iha kazu omesídiu (oho malu), tara án, krime seksuál, krime korupsaun no selu-seluk tan”, informa ba jornalista sira iha Palásiu Prezidente Nicolau Lobato Bairru Pité, tersa ne’e hafoin enkontru ho Xefe Estadu.

Kazu kriminalidade hirak ne’e, tenik, Ministériu Públiku oras ne’e hala’o hela estudu molok haruka ba Tribunál hodi prosesa.

Aleinde ne’e, PJR mós informa ba Prezidente Repúblika kona-ba planu ne’ebé atu trasa iha fulan ida ne’e (12-13 janeiru), Ministériu Públiku sei halo retiru ida ho objetivu atu hametin serbisu Ministériu Públiku ninian.

“Ami informa mós kona-ba kazu balun liu-liu rejistu iha Munisípiu Baukau ho krime natureza seksuál ne’ebé ás oituan iha territóriu Timor laran no tuir maka iha Suai ne’ebé rejistu mós prosesu krime seksuál ninian”, esplika.

Nia hatutan iha mós kazu omesídiu tolu ne’ebé akontese iha Maliana, hafoin ne’e aprezenta kedas ba Tribunál Suai. Akontese mós juridisaun ida iha Manatuto ne’ebé iha indikasaun omesídiu (tara án)—prosesu autópsia la’o tiha ona no entrega ona mate isin ba família.

Iha biban ne’e, Xefe Estadu husu Ministériu Públiku nune’e iha tinan ne’e (2018) hadi’a di’ak liu-tan serbisu hodi kombate kriminalidade.

“Prezidente Repúblika nia preokupasaun boot maka krime sira ho natureza krime seksuál, abuzu seksuál no krime korupsaun. Tanba ne’e, ami sei reforsa liu-tan ami nia kna’ar iha tinan ne’e. Ami hahú kedas ho retiru anuál ne’ebé normalmente prokuradór sira ne’ebé serbisu iha Ministériu Públiku aprezenta planu ba tinan ida nian. Ami iha ona planu orientasaun maibé tinan-tinan presiza enkontru para junta esforsu”, hatutan.

Jornalista: Xisto Freitas

Editora: Rita Almeida

HUSIK IDA HATÁN