PAS Korea Halo Interkámbiu ho UNTL

0
65
Reitór Francisco Miguel Martins tara tais no kaer liman ho membru PAS, Korea Sul. Foto: Mídia UNTL

DILI (TATOLI)-Pacific Asia Society (PAS), husi Korea Sul halo interkámbiu ho Universidade Nasionál Timor Lorosa’e (UNTL), hahú ohin to’o 20 janeiru 2018 hodi troka esperiénsia no koñesimentu kona-ba kultura no setór importante sira hanesan saúde, edukasaun, desportu no seluk tan entre joven eh estudante sira, nasaun rua, Timor-Leste no Korea Sul.

PAS ne’e kompostu husi estudante sira husi universidade 18 ne’ebé mak iha Korea Sul.

Reitór Francisco Miguel Martins dehan iha Kampus sentrál, UNTL, Díli, tersa (09/01) ba profisionál komunikasaun sosiál sira katak, antes ne’e UNTL mós haruka ona estudante husi universidade ne’e ba iha Korea, maske la haruka estudante barak tanba limitasaun orsamentu.

Tinan ne’e, Korea Sul liuhusi programa hanesan ho tema Together We Diversify Learning Oportunities ka Hamutuk ita Diversifka Oportunidade Aprende hodi mai fali iha UNTL.

“Atividade estudu interkámbiu ne’e estudante sira mai atu aprende no partilla hamutuk ho estudante UNTL iha asuntu saúde, edukasaun, kultura no desportu,” akresenta reitór UNTL ne’e.

Sekretáriu Jerál PAS Lee Soo Ok, apresia UNTL. “Ami apresia UNTL tanba oferese oportunidade ba ami-nia estudante, hodi sai belun di’ak no aprende hamutuk ho estudante UNTL sira,” dehan sekretáriu ne’e.

Estudante UNTL ne’ebé antes ne’e hetan mós oportunidade ba iha Korea Sul, Brígida Martinha Barreto haktuir katak sira antes ne’e ba iha Korea, sira hetan oportunidade hodi aprende kultura, atividade sira ne’ebé hala’o iha Korea, kanta tradisionál Korea, Ariran, lian nomós dansa tradisionál balun.

“Alende aprende kultura, ami aprende mós kona-ba tempu tanba sira respeita tebes tempu. Sira respeitu tempu; oras, la hanesan ita nian ne’ebé dalaruma mai kadavez la tuir oras,” informa Brígida Martinha.

Programa interkámbiu daruak ne’e, estudante Koreanu sira ne’ebé envolve iha PAS ne’e na’in 26 ho supervisor na’in rua. Durante estadia iha TL, estudante sira ho supervisor ne’e sei fasílita husi Gabinete Pró-Reitoria Asuntu Koperasaun Nasionál no Internasionál, UNTL nian.

Entretantu iha abertura interkámbiu PAS husi Korea Sul ho UNTL, ohin hahú ho aprezentasaun oi-oin.

Husi UNTL aprezenta, dansa tradisionál Babadok, dansa Folklore no hananu tradisionál ho títulu Doben Timor no Aio Helele.

Husi PAS Korea aprezenta dansa Taekwondo, fan dance ka dansa kakehe no K-POP (Korean POP).

Iha semana rua ne’e, estudante husi nasaun rua sei aprezenta mós atividade no programa oi-oin tuir oráriu no ajenda sira ne’ebé mak determinadu ona.

(Jornalista: Rafy Belo)

(Editór : Manuel Pinto)

HUSIK IDA HATÁN