MPF Hasai Ona Sirkulár Ezekusaun Orsamentu Duodecimo

0
350

DILI (TATOLI)-Ministériu Planu no Finansa ohin, Kinta (11/01) realiza enkontru ida ho liña ministerial hodi hasai sirkulár kona-bá preparasaun no ezekusaun dotasaun orsamentu Duodecimo.

Vise-Ministra Planu no Finansa, Sara Lobo Brites, hatete lei fó dalan atu kontinua uza orsamentu tranzitóriu ka duodecimal to’o bainhira Orsamentu Jerál Estadu (OJE) 2018 hetan aprovasaun, maibé duodecimal ne’e aloka de’it ba kategoria haat; saláriu no vensimentu, bens no serviços, transferénsia públika no kapitál dezenvolvimentu, la inklui kapitál menór.

“La inklui kapitál menór tanba limita ne’ebé iha no konsidera ba prosesu ne’ebé lori tempu atubele ezekuta”, Vice Ministra Sara esplika iha edifísiu Ministériu Planu no Finansa (MPF), Ai tarak-Laran, bainhira partisipa enkontru ho liña ministériu sira hodi hasai sirkulár kona-ba preparasaun no ezekusaun dotasaun orsamentu temporáriu 2018, ohin.

“Konsellu Ministru no hetan tiha ona aprovasaun ba duodecimal Janeiru nian. Janeiru ita iha ona tetu maibé ezersísiu ida ne’e ita sei halo to’o ita iha ona orsamentu definitivu ida no ita sei hasoru malu fulan-fulan tetu ba ita-nia osan ne’ebé mak iha ita-nia kofre”.

Objetivu hosi hasoru malu fulan-fulan mak asegura funsionamentu estadu nian, tanba daudaun ne’e Governu Timor-Leste seidauk iha OJE 2018.

Enkuantu hahú iha loron 1 Janeiru tinan ne’e, rejime duodecimal tama ona em vigor ne’ebé prevee iha artigu 310, lei númeru 13/2009, 21 Outubru iha Lei Orsamentu no Jestaun Finanseira, tanba OJE 2018 seidauk hetan aprovasaun, tanba ne’e, situasaun sira hanesan ne’e, lei fó dalan ba Governu atu rekorre ba rejime duodecimal hodi asegura finansiamentu natoon atu nune’e Estadu bele kontinua fó prestasaun servisu ba populasaun, selu saláriu ba kolaboradór Estadu nian.

Vice Ministra informa mós katak iha rejime duodecimal aplika prinsípiu rua maka kada dotasaun orsamentál kobre de’it despeza ida durante períodu, laliu fulan ida no kualkér dotasaun orsamentál labele liu um doze avos (1/12) husi dotasaun orsamentál ne’ebé define tiha ona tuir Lei OJE tinan kotuk nian, iha lei númeru 13/2016, 29 Dezembru.

“Orsamentu ne’e ba períodu ida de’it, laliu husi fulan ida. Orsamentu ida ne’e aplika rejime duodecimos katak orsamentu tinan ida fahe ba fulan 12 ne’ebé aloka ba fulan ida tantu fulan ida ne’e nia rumus ne’e orsamentu 2017 la inklui kapitál menór pur tantu menus tiha kapitál menór no fahe ba fulan 12, ida ne’e mak alokasaun ba Janeiru nian”.

 (Jornalista : Maria Auxiliadora)

(Editór : Manuel Pinto)

HUSIK IDA HATÁN