Mosaun Sensura La Reflete KRDTL

0
204
Xefe Bankada Partidu FRETILIN, Francisco Miranda Branco. Imajen Mídia Palásiu PR.

DILI (TATOLI)—Xefe Bankada partidu Fretilín, Francisco Branco dehan, mosaun sensura ne’ebé aprezenta hosi Aliansa Maioria Parlamentár (AMP) hasoru sétimu governu la reflete ba iha Konstituisaun Repúblika Demokrátiku Timor-Leste (KRDTL) artigu 111.

Branco konsidera mosaun sensura ne’ebé opozisaun halo uza hodi hamonu de’it governu, tanba realidade hatudu katak durante ne’e iha Parlamentu Nasionál opozisaun la koopera bankada governu (Fretilín ho PD).

Opozisaun iha Parlamentu blokeiu tomak atividade komisaun, ezemplu ida mak difisil tebes hetan konsertasaun ba aprezentasaun projetu lei anti korrupsaun ne’ebé bankada governu tau iha ajenda prioridade.

“Opozisaun sira hakarak hamonu governu liuhosi mosaun sensura, maibe la tuir espíritu artigu 111 K-RDTL haktuir, PN bele hato’o sensura ba governu kona-ba implementasaun programa governu,” Francisco Branco esplika liuhosi konferénsia imprensa iha sala bankada Fretilín, Kuarta (17/01).

Nia dehan, se opozisaun la simu programa governu, signifika programa ladauk implementa, maibé  tanbasá bankada opozisaun hatama mosaun sensura ba governu? Tuir loloos, mosaun sensura seidauk nia tempu.

Nune’e mós destituisaun hasoru Prezidente Parlamentu Nasionál, opozisaun sira hakarak hadau podér. Tanba ne’e, haree hosi realidade polítika ne’ebé opozisaun sira hatudu iha PN durante ne’e, Branco konklui katak, hamosu situasaun inserteza ne’ebé lakohi povu nia moris di’ak.

Enkuantu Bankada Fretilín ho PD hakarak serve ba povu no nasaun liuhosi servisu hamutuk tuir povu nia hakarak ne’ebé espresa liuhosi eleisaun jerál katak se mak manan ba ukun hamutuk hodi serve povu no nasaun, no se mak seidauk manan fó liman ba malu hodi servisu hamutuk ba interese povu no nasaun ni’an.

(Jornalista : Zezito Silva)

(Editór : Manuel Pinto)

HUSIK IDA HATÁN