Ministru Estanislau Informa Serbisu Agrikultura Ba PM

0
75
Ministru Estadu no Ministru Agrikultura no Peska, Estanislau Aleixo da Silva.

DILI, (TATOLI) – Ministru Estadu no Ministru Agrikultura no Peska (MAP), Estanislau Aleixo da Silva, informa serbisu agrikultura nian ba Primeiru-Ministru liuliu lansamentu ba Sustainable Agriculture Productivity Improvement Project (SAPIP) ne’ebé sei hala’o semana oin iha Oekusi.

SAPIP nu’udar projetu Banku Mundiál ne’ebé fó apoiu ba Timor-Leste iha área agrikultura liuliu kona-ba bacias hidrográficas ho totál valór millaun 21 dólar durante tinan lima nia laran.

“Tinan kotuk halo tiha ona lansamentu iha Raumoko, parese semana oin ami bá halo lansamentu, como ami rona dehan Primeiru-Ministru mak bá iha ne’ebá entaun ami hanoin di’ak liu aproveita programa Primeiru-Ministru nian aumezmu tempu bele tau hamutuk ami-nia programa para Primeiru-Ministru bá halo mós lansamentu tanba ne’e iha Oekusi”, katak Estanislau iha Palásiu Governu, ohin.

Lansamentu daruak ba projetu SAPIP ida ne’e mós sei halo mós iha fatin haat inklui Ainaru no Loes.

“Projetu ida ne’ebé finansiadu husi Banku Mundiál, totál valór millaun 21 dólar ba tinan lima nia laran. Ida ne’e serbisu la’o daudaun ona no agora ami bá halo lansamentu”.

Aleinde ne’e relata mós serbisu agrikultura nian ba PM tanba sei iha atividade entrega ekipamentu agrikultura ne’ebé Xina oferese ba MAP hodi ajuda ministériu liuliu eskavadór rua hodi halo serbisu iha área irrigasaun.

“Serbisu seluk liuliu kontinuidade serbisu balun ne’ebé ami entrega ona ba gabinete Ministru Dezenvolvimentu nian hanesan dekretu lei ho dekretu Governu balun, kona-ba implementasaun lei investimentu, SERVE, TradeInvest uluk iha gabinete koordenasaun ekonómika agora iha Ministériu Dezenvolvimentu nian ne’ebé Primeiru-Ministru rasik mak tau matan no hein ami prepara tan no gabinete Ministru Dezenvolvimentu sei lori ba Konsellu Ministru para halo aprovasaun para ne’e ita bele implementa lei investimentu, lei rejistu komersiál, ita presiza dekretu Governu para implementa lalais”.

Jornalista: Maria Auxiliadora

Editora: Rita Almeida

HUSIK IDA HATÁN