Ministru Defeza no Seguransa Agradese Kontribuisaun Sosiedade

0
140
Ministru Seguransa no Defeza, José Agostinho Sequeira Somotxo, dadalia ho jornalista sira iha Palásiu PR.

DILI, (TATOLI) – Ministru Seguransa no Defeza, José Agostinho Sequeira Somotxo, hateten situasaun iha nível nasionál la’o di’ak tebes no ida ne’e hanesan primeiru pasu tanba sosiedade garante estabilidade.

“Ita nia povu presiza estabilidade. La presiza konflitu, nune’e bele loke dalan ba Estadu atu dezenvolve ita nia Nasaun”, katak Somotxo ba jornalista sira iha Palásiu Prezidente Nicolau Lobato Bairru Pité, sesta ne’e hafoin relata situasaun seguransa ba Prezidente Repúblika, Francisco Guterres Lú Olo.

Somotxo agradese ba sosiedade tomak ne’ebé fó ona kontribuisaun ba estabilidade no pás iha loron Natál no Tinan Foun.

“Maske konflitu ki’ik-oan sira akontese iha fatin balun maibé risku ki’ik. Ida ne’e la’ós akontese de’it iha Timor maibé akontese mós iha nasaun barak. Dalaruma hemu tua lanu no liafuan sidi ba malu bele akontese problema ki’ik sira hanesan ne’e”, haktuir.

Iha biban hanesan, Komandante Jerál Polísia Nasionál Timor-Leste (PNTL), Komisáriu Júlio da Costa Hornay, hato’o mós agradesementu ba populasaun tanba bele garante estabilidade durante selebrasaun Natal no Tinan Foun.

“Lori Komandu PNTL nia naran hakarak hato’o parabéns ba povu Timor laran tomak tanba liuhusi povu nia apoiu kontribui ona ba estabilidade no pás”, hato’o Hornay.

Jornalista: Xisto Freitas

Editora: Rita Almeida

HUSIK IDA HATÁN