MDS Haree Besik Ró UPM 19

0
115
Ministru Defeza no Seguransa (MDS), José Agostinho Sequeira Somotxo.

DILI, (TATOLI) – Ministru Defeza no Seguransa (MDS), José Agustinho Sequeira Somotxo, ohin ho gabinete inspesaun auditória halo vizita kortezia ba Unidade Polisia Marítima (UPM) hodi haree besik ró hamutuk 19 ne’ebé hetan ona manutensaun.

“Ha’u mai vizita Unidade Polísia Marítima (UPM) atu haree ró hirak ne’ebé ho nia manutensaun foin hotu iha 27 dezembru tinan kotuk”, informa ba jornalista sira iha edifísiu UPM Lecidere hafoin haree rasik ró hirak ne’ebé iha tasi laran.

Nia haktuir prezensa ida ne’e atu haree loloos funsionamentu no manutensaun ne’ebé lori tempu naruk maibé komandante sira esplika ona katak ró hirak ne’e atinje ona pursentu 100 maibé entre ró 19 ho ró haat mak sei iha prosesu manutensaun.

Iha fatin hanesan, Superintendente UPM, Lino da Silva Saldanha, orgullu ba prezensa MDS, Somotxo nian tanba tenta dala barak ona atu hasoru maibé la konsege no ohin bele fó tempu hodi hakat mai iha UPM atu haree kondisaun ró ne’ebé hetan ona manutensaun.

Nia dehan totál orsamentu ba manutensaun ró 19 hamutuk 200.000 resin dolar amerikanu ne’ebé kaer hosi kompañia Auto Zon.

“Ministru Somotxo haree direta ró iha terenu liliu ró Luzitanio ho metró 29 ne’ebé boot liu hosi ró sira seluk tanba orsamentu ba manutensaun ne’e mai hosi governu anteriór 2017”, realsa.

Enkuantu, kompañia Auto Zon ne’ebé halo manutensaun ba ró hirak ne’e kompletu ona maibé hela ró haat ne’ebé sira halo atu kompleta hodi hadi’a ró di’ak liu tan.

“Ida ne’e mak ohin ami hatudu rezultadu projetu manutensaun ba ró hirak ne’e, obra ne’e mós remata ona maibé ba oin Estadu nia obrigasaun atu selu kompañia ne’ebé halo manutensaun”, hateten.

Tuir nia manutensaun ró iha Nasaun sira dezenvolvidu rutina tebes maibé iha Timor-Leste dalaruma tinan ida eh rua mak foin halo manutensaun, ida ne’e frakeza maibé ba oin bele hadi’a sistema.

“Ita triste tebes, ministru ohin haree kondisaun hirak ne’e ho tristeza tanba ró hirak ne’e kondisaun ladun afavor maibé situasaun Nasaun mak nune’e, maibé ró ita iha ona hakarak ka lakohi ita tenke kuidadu maske kondisaun nune’e maibé ita bele uza”, dehan.

Haktuir tan importante mak membru sira espiritu badinas, responsabilidade, disiplina, servisu ho kolaborativu no evita barukten atu bele mantein unidade.

servisu todan ba UPM mak kuandu lori ró ba tasi klaran, atu asegura ema seluk tenke salva-an, kuandu ita lahatene salva ró mós ladun di’ak signifka estraga ita nia vida.

Nia afirma servisu marítima dalaruma ko’alia katak mehi di’ak mak ba tasi maibé kuandu mehi ladiak lalika tun ba tasi tanba tasi ne’e la’os atu ba Lospalos ka Suai, enkuantu ba Atauro de’it mós kuandu ró nakfera iha tasi klaran bolu inan aman mós la hetan, se nani mós dalaruma la biban kuandu forsa la iha ona.

Jornalista: Zezito Silva

Editora: Rita Almeida

HUSIK IDA HATÁN