MAP Sei Tau Tratór Boot Rua iha Atabae no Urlefa

0
138
Diretór Nasionál Agrikultura, Ortikultura no Estensaun, MAP, Amaro Ximenes.

DILI, (TATOLI)-Materiál agrikultura ne’ebé hetan doasaun husi Xina ho kontentór 19 daudaun ne’e iha ona Ministériu Agrikultura no Peska (MAP) no iha tratór boot rua ne’ebé mak hetan ona despaxu husi ministru Estanislau Aleixo da Silva atu tau iha Atabae no Urlefa.

“Tratór boot ida sei tau iha Atabae relasiona ho irrigasaun Loes nian no ida sei tau iha Urlefa, Maubise, ne’ebé nia funsaun ne’e atu bá dezenvolve ortikultura iha parte ne’ebá tanba área ne’e poténsia tebes ba ortikultura”, dehan Diretór Nasionál Agrikultura, Orikultura no Estensaun, Amaro Ximenes, iha Komoro, ohin.

Aleinde ne’e iha mós mákina kuda Batar nian ne’ebé mak sei tau iha SPP Natarbora no restu sei halo hela planu ba distribuisaun nian no alokasaun ba fatin ne’ebé mak atu lori bá.

“Maibé ami mós agora daudaun hanoin hetan hela buat ne’ebé prioridade liu iha irrigasaun hitu importante mak Maliana I no II, Oebaba, Kasa, Karau Ulun, Bulutu. Ida ne’e sai hanesan prioridade ne’ebé ami hato’o ona ba ministru, maibé ne’e hetan lai lista aprovasaun husi superiór hafoin mak bele halo alokasaun ba ne’ebé”.

Kona-ba ajudu husi Xina ne’e daudaun MAP sobu hela kontentór 19 no hasai ona tratór boot 12 ne’ebé mak rua identifikadu atu aloka ona no restu sei halo hela planu.

Nune’e mós sei iha tan tratór ki’ik, mákina kuda no baku hare no dulas hare nian mak nasaun ne’e fó ba Timor-Leste.

(Jornalista : Maria Auxiliadora)

(Editór : Manuel Pinto)

HUSIK IDA HATÁN