Maneira Fasil Hetan Bolsa Mak Badinas

0
416
Alumni, University of Florida, Maria Assunção Barreto. Foto: Facebook

DILI (TATOLI)-Konselleira Edukasaun EUA, Maria Assunção Barreto Gama informa katak maneira fasil  atu bele hetan oportunidade bolsa estudu hodi estuda iha rai li´ur, liu-liu Estadu Unidu Amérika (EUA) mak ita tenke badinas.

Simplesmente badinas buka informasaun liuhusi dalan sira hanesan mídia, internet. Maibé la´ós facebook, instagram, twitter de´it.

Iha EUA, iha universidade barak oferese bolsu estudu, la’ós hanesan ita bolu full scolharship maibé iha finanseiru ne’ebé bele ajuda timoroan, estudante husi nasaun seluk hodi ba estudu iha sira-nia koléjiu.

“Dalan ne’ebé fasil  mak ita tenke badinas buka rasik, universidade iha Amérika barak, ita hili universidade ne’ebé ita hakarak, depois ita apply,” hateten konselleira Maria Assunção ba Ajénsia TATOLI, iha nia kna´ar fatin, Kampus Resende-Dili, Kuarta (17/01).

Nia hatutan, bainhira apply (aplika) tiha, ita tenke haree ninia finanseiru sira. “Ne’ebé, ita tenke buka rasik liuhusi mídia, internet, la’ós uza de’it ba facebook, instagram, twitter maibé uza mós ba buka bolsu estudu. Bolsu estudu iha li’ur iha maibé ita mak tenke badinas buka,” nia fó hanoin.

Alumni University of Florida, USA ne´e esplika katak se mak hakarak atu aplika no liu iha selesaun bolsu estudu presiza koko antes no tempu besik ona mak foin ansi aan ba aplika, hakerek essay, hakerek buat hotu-hotu. Ne´e nia rezultadu sei ladún di´ak kompara ho ita foti aplikasaun kle´ur.

“Preparasaun antes para ita halo revizaun ba ita-nia dokumentu sira, ne´e importante tebes,” salienta graduadu Biokímika, Maria Assunção Barreto Gama ne´e.

Nia esplika, hakerek essay atu sai di´ak no bele konvense panelista eh jurista sira hodi bele liu selesaun, tuir nia esperiénsia mak ita tenke onestu ba ita-nia aan rasik; istória ne´ebé ita hakerek ne´e mai husi ita-nia aan rasik.

Lee pergunta didi’ak; ita-nia essay ne’e resposta duni ba pergunta ka lae? Baba’in ita fó idea halai ba mai loos, ita tenke fokus tanba ne’e mak preparasaun importante.

Etapa primeiru kuandu ita hakerek ita-nia essay, ita hakerek de´it, saida mak iha ita-nia ideia ita hakerek de’it. Hakerek tiha hotu ita haree tuir katak hatán duni pergunta ne’ebé sira husu ka lae? Entaun ita halo revizaun.

Hakerek Essay ne’ebé di’ak ita tenke halo uluk brain storming, lee barak hodi hetan ideia sira seluk, ita tenke lee referénsia barak, labele kópia saida mak ita lee tomak ba iha pergunta. No Copy Paste.

Presiza lee barak, komprende, no koko halo relasiona ho saida mak akontese. Presiza preparasaun, tenke halo revizaun depois, labele fó ba ema ne’ebé koñese ita, se lae bele hateten de’it mak buat di’ak de’it. Hili ema ne’ebé la hatene ita di’ak liu ita para lee, para sira fó fila fali hanoin kona-ba saida mak ita hakerek ne’e. “Ita mós tenke prontu simu krítiku,” nia sujere.

Konselleira Edukasaun USA, Maria Assunção haktuir nia esperiénsia katak bainhira ita liu bolsa ruma no estudu iha EUA, amerikanu sira independente tebes katak profesór la´ós tuituir ita hodi halo traballu uma nian.

Profesór sira la tuituir ita hatama traballu hanesan ne´e, hanesan ne´ebá. Sílabu sira profesór sira hatama antes ona ho ida-idak nia tópiku. Ne’ebé, iha semester ida ne’e ita atu aprende saida ita iha tiha ona, fó mai ita, ita atu halo preparasaun ba aula, matéria ida ne’ebé, ba buka rasik livru sira.

Traballu kuandu iha ita tenke lalais tanba bainhira sistema liu oras, traballu sira ita submete ka hatama la di´ak ona. “Ne’ebé iha ne’ebá (EUA) independente loos, ne’ebé ita mak tenke ser maneja ita-nia aan rasik, ita-nia jadwal rasik. Buat di’ak, hanorin ita labele depende demais,” nia akresenta.

Nia reforsa tan bainhira ita iha oportunidade estuda iha EUA atu adapta aan ho ambiente no ema seluk husi nasaun seluk, tuir nia, fofoun ne´e susar tanba hanesan timoroan dalaruma hakarak ko’alia ita-nia lian rasik, diferente oras.

Ita sente katak dala ruma ita ko’alia inglés, primeira, ita ko’alia inglés ema la komprende, ne’ebé dala ruma ita tenke repete fila fali. Dala ruma ita-nia logat eh sotake oin seluk.

Maibé, iha USA dala ruma ita ko´alia sala ka loos ema ladún fó importánsia. Maibé kuandu toma ona ho kolega sira, kolega di´ak ona dala ruma sira hamnasa. Enjoy ita-nia tempu iha ne’ebá. “Ha’u sujere labele ta’uk, labele moe,” nia fó hanoin tan.

Ikus liu, hanesan konselleira edukasaun EUA, nia fó mensajen ba estudante timoroan sira katak keta hakiduk hasoru dezafiu, monu hamriik nafatin luta kontinua ho esforsu aan.

Don’t give up. Labele patah semangat. Monu dala ida La’ós finál husi buat hotu-hotu. Hamriik luta kontinua nafatin. Atu hetan independénsia mós ita monu dala hira mak foin ita hetan. Kaer ida ne’e nafatin, iha mehi aas, keta tauk atu mehi, naran katak ita tenke iha esforsu aan nafatin. Mehi aas, estuda maka’as, buat hotu dalan iha. Ba joven sira seluk labele ta’uk atu mehi, labele patah semangat. Kuandu monu hamriik nafatin, koko nafatin, loron ida ita sei susesu,” nia fó mensajen.

 (Jornalista: Rafy Belo)

(Editór : Manuel Pinto)

 

HUSIK IDA HATÁN