DILI, (TATOLI) – Prezidente Repúblika, Francisco Guterres Lú Olo, hateten atu sai lideransa di’ak hodi ukun povu tenke hatene serbí ho haraik-án no domin.
“Ba ha’u haraik-án ne’e ukun nain sira tenke hatene rona, hatene sukat no hatene haksesuk ho laran hakmatek hodi simu ema nia opiniaun hosi ema seluk hodi sukatʺ, dehan Lú Olo bainhira partisipa selebrasaun Natal hamutuk ne’ebé organiza hodi Xefe Governu ho órgaun Estadu iha salaun parókia Nossa Señora Imaculada da Conçeição Katedrál Dili, domingu ne’e.
Xefe Estadu hatutan iha loron 17 setembru 2013, Amu Papa Francisco iha ninia mensajen haktuir ba ukun nain bele ukun di’ak bainhira haraik-án no hadomi povu no ukun nain labele ukun bainhira laiha domin.
Atu ukun di’ak, tuir Lú Olo hatene ko’alia ba malu no serbí di’ak hodi sai mata dalan ba aspirasaun povu hodi lori moris di’ak ba povu.
Hatutan tan ukun la’ós atu hatudu de’it podér maibé tenke garante povu atu asesu estrada, bee moos, saúde, edukasaun, pás, estabilidade no seluk tan.
“Lideransa ne’ebé eleitu hosi povu atu haraik-án, serbí Estadu no povu ho domin, servidór Estadu la’ós atu hala’o de’it prestasaun servisu iha tempu badak ka naruk nia laran hodi haree de’it ba nia-án, família ka partidu, maibé ba interese Estadu no povuʺ, tenik.
Lú Olo konsidera serbí estadu ne’e hanesan vokasaun ida, ne’ebé servidór tenke kumpri ho dever no responsabilidade atu lori moris di’ak ba ema hotu, liliu kore povu hosi kiak.
Jornalista: Agapito dos Santos
Editora: Rita Almeida
