Lere: Situasaun Át Sei La Mosu

0
218
Enkontru entre Xefe Estadu Maior FALINTIL-Forsa Defeza Timor-Leste (F-FDTL), Majór Jenerál Lere Anan Timur ho Prezidente Repúblika, Francisco Guterres Lú Olo. Imajen Mídia Palásiu PR.

DILI, (TATOLI) – Xefe Estadu Maior FALINTIL-Forsa Defeza Timor-Leste (F-FDTL), Majór Jenerál Lere Anan Timur, hateten maske ohin loron populasaun preokupa ba situasaun polítika iha rai laran, maibé garante katak situasaun át sei la mosu.

“Ha’u garante katak situasaun át sei la mosu. Se krize mosu, mosu iha Parlamentu ne’ebá maibé povu sei hakmatek no F-FDTL no PNTL sei garante seguransa ba sira hodi hala’o sira nia atividade lor-loron nian”, Lere hato’o ba jornalista sira iha Palásiu Prezidente Nicolau Lobato Bairru Pité, kuarta ne’e hafoin informa situasaun seguransa ba Prezidente Repúblika, Francisco Guteres Lú Olo.

Nia dehan tempu to’o ona timoroan sira konfia líder istóriku sira hanesan Xanana Gusmão, Marí Alkatiri, Ramos Horta no sira seluk atu lori Nasaun ne’e ba oin ho di’ak.

“Ha’u nia tópiku ba tinan ida ne’e maka “Respeitu no Konfiansa”. Respeitu signifika katak iha edukasaun no konfiansa signifika katak lori tempu hosi ita nia prátika, hosi ita nia liafuan, hosi ita nia karáter maka manán ita nia konfiansa. Tanba ne’e, sira na’in hira ne’ebé ha’u temi ne’e tempu to’o ona para ita konfia sira”, afirma eis líder rezisténsia.

Iha oportunidade ne’e, Xefe Estadu Maior F-FDTL lamenta ho ema balun ne’ebé oras ne’e soe lia bar-barak atu fahe líder sira liu-liu líder rezisténsia ninian. Tuir Lere ne’e inimigu ninia hanoin ne’ebé la’ós foin hahú maibé uluk iha funu mós hakarak fahe timoroan sira nune’e sira bele hetan ukun lalais.

“Ha’u hanesan líder ida, ema seluk mai obriga ha’u atu kontra Xanana, Marí, Ramos Horta no sira seluk, ne’e defisil tanba ami jura ho ran. Ami nia maluk barak mate iha ami nia liman laran, sira nia ran fakar iha ami nia leten no ami debe sira. Tanba ne’e, sé ami fahe malu, hanoin katak matebian sira sei haree tuir ami”, afirma tan.

Nia hateten Xanana, Marí no Ramos Horta ne’e timoroan sira nia líder istóriku, tan ne’e hotu-hotu tenke respeita sira, tanba sira halo buat barak ba Timor maka ohin loron Timor bele ukun án no timoroan sira bele foti oin hodi ko’alia.

Jornalista: Xisto Freitas

Editora: Rita Almeida

HUSIK IDA HATÁN