Lere Dezkontente Juventude Instulta Líder Nasionál

0
808

DILI (TATOLI)–Eis Lidér Rezisténsia, Lere Anan Timur deskontente ho Grupu Juventude hanaran án defende Konstituisaun ne’ebé insulta líder nasionál balun.

“Grupu Juventude Defende Konstituisaun krítika Primeiru Ministru, Dr. Marí Alkatiri liuhusi televizaun dehan Primeiru Ministru arogante, antí demokrasia no laiha sentidu Estadu. Joven sira ne’e hanoin sala ona. Pudia sira aprende ho katuas sira. La’ós sira maka mai atu hanorin fali katuas sira. Katuas sira esperiénsia halo polítika durante tinan 40 itál ona,” atuál Majór Jenerál F-FDTL hato’o kestaun ne’e ba jornalista sira iha Palásiu Prezidente Nicolau Lobato, Bauru Pité, Dili, kuarta ne’e.

Tuir Lere katak joven hirak ne’e nia atetude hakat liu ona demokrasia ka tama ona iha ultra demokratizmu.

“Hanesan mós iha Parlamentu. Katak, joven sira de’it maka sai deputadu iha Parlamentu Nasionál, tan ne’e, loloos tenke defende interese nasaun no povu. Bainhira ita defende aspirasaun povu, ita ko’alia ona kona-ba estabilidade nasionál,” nia esklarese.

Lere apela ba juventude atu sukat lian no respeitu líder sira ne’ebé maka lori ona nasaun ne’e ba ukun án.

Veteranu ne’e informa katak maske mosu inpase polítika maibé krize sei la akontese iha Timor no hatutan katak aban bainrua Prezidente Repúblika toma desizaun ida neutru ba inpase polítika iha rai laran, Forsas Armadas sei apoiu.

(Jornalista: Xisto Freitas)

(Editór : Manuel Pinto)

HUSIK IDA HATÁN