Laiha Ajenda Fiksa, Ohin Laiha Sesaun Plenária

0
84
Parlamentu Nasionál. Foto espesiál

DILI, (TATOLI) – Sesaun plenária ne’ebé mak tuir rejimentu Parlamentu Nasionál artigu 42, tenke realiza iha segunda no tersa kada semana, ohin 23 janeiru labele realiza tanba laiha ajenda fiksa Ordem do Dia nian ba plenária normál ida.

Tuir komunikadu husi Gabinete Prezidente Parlamentu Nasionál, iha konferénsia líder bankada parlamentár sira iha sesta 19 janeiru, bankada opozisaun ne’ebé hanaran Aliansa Maioria Parlamentár (AMP), kompostu husi Kongresu Nasionál Rekonstrusaun Timor (CNRT-sigla portugés), Partidu Libertasaun Populár (PLP) no Kmanek Haburas Unidade Nasionál Timor Oan (KHUNTO) ezije atu halo plenária hodi hato’o sira nia deklarasaun polítika maibé kestaun ne’e so bele hato’o iha periode de antes da ordem do dia, enkuantu laiha ordem do dia.

Desde tama tinan foun 2018, Parlamentu Nasionál seidauk konvoka sesaun plenária tanba mosaun sensura hasoru governu hafoin hetan justifikasaun husi Parlamentu Nasionál no liu husi konsertasaun ne’ebé halo ona. Governu responde ona katak sei disponível atu hatan iha Parlamentu Nasionál ihaloron 31 janeiru.

Maské nune’e, bankada opozisaun sempre ezije tansá laiha sesaun plenária iha loron 15,16 22 no ohin 23 janeiru, maibé iha konferénsia líder bankada parlamentár deside ona loron debate mosaun sensura no sei marka plenária extraordinária ba debate ne’ebé nia durasaun labele liu loron tolu.

Enkuantu proposta atu hatun Prezidente PN seidauk halo ajendamentu tanba hein desizaun husi Tribunál Rekursu ne’ebé Prezidente hatama ona. Nune’e respeitu ka labele viola direitu de rezisténsia no legítima defesa, e direito asesu Tribunál sira ne’ebé Konstituisaun garante ba sidadaun idak-idak.

Jornalista: Julia Chatarina

Editora: Rita Almeida

HUSIK IDA HATÁN