Kustu Lisensiamentu Sektorál Ba Emprezáriu Ho Dólar 45

0
119
Diretór Ezekutivu SERVE, Florêncio Sanches.

DILI, (TATOLI) – Diretór Ezekutivu Servisu Rejistrasaun no Verifikasaun Emprezariál (SERVE), Florêncio Sanches, hatete 25 janeiru SERVE sei implementa lisensiamentu sektorál ba emprezáriu ou kompañia sira no kustu atu hetan lisensa ida ne’e ho dólar 45, maibé antes ne’e lisensa ne’ebé fó husi Ministériu Komérsiu no Indústria (MKI) ho kustu dólar 105.

Nune’e SERVE halo ona enkontru ho diretór jerál komérsiu, Ministériu Komérsiu no Indústria (MKI), hodi hatete lei foun fó kompeténsia MKI nia mai fali SERVE atu emite suratahan (lisensiamentu sektorál nian).

“Maibé buat hotu ne’ebé mantein iha komérsiu halo de’it monitorizasaun, fisklalizasaun, inspesaun entaun lei ne’e hatete SERVE só para hasai de’it nia suratahan no lei mós hatete SERVE sei relata ba instituisaun hotu atu foti sira-nia knaar hanesan baibain”, dehan Florêncio iha Matadouru, ohin.

Tuir lei dokumentu hotu halo iha fatin ida no ikus liu ne’e mak lisensiamentu sektorál atu implementa iha loron rua mai tan.

Kustu ne’ebé uluk MKI hasai atu hetan lisensa komersiál ho dólar 105 nune’e iha 25 janeiru bá oin sei hatún ba dólar 45 de’it. Razaun hatún kustu ne’e tanba realidade hatudu 20 mil resin empreza ne’ebé rejistu iha SERVE porsentu 90 husi 20 mil ida ne’e negósiu ki’ik.

“Entaun 105 ita aplika ba negósiu ki’ik, negósiu boot ne’ebé ho porsentu 10 lasente, maibé ki’ik sente”.

Hatutan sektorál ida ne’e kona lisensiamentu entaun SERVE sei relata ba instituisaun relevante no instituisaun sira ne’e mós sei relata filafali ba SERVE durante loron 90 para SERVE hasai suratahan.

“Instituisaun hotu ne’ebé kona área sektorál ida ne’e, sira mak sei halo nia kompeténsia tomak ba serbisu ida ne’e depois sira-nia lei rasik iha no SERVE labele intervene no simu de’it pedidu loos ona atu hasai nia suratahan mak uluk kona dólar 105, agora sei kona dólar 45”.

Atu hetan lisensiamentu sektorál ida maka sei fó de’it ba kompañia sira ne’ebé hala’o atividade, maibé ho risku aas hanesan peñor, banku no empreza fa’an mina atu hetan lisensa sektorál husi instituisaun relevante hanesan Banku Sentrál no Autoridade Nasionál Petróleu no Minerál no atividade risku sira seluk ne’ebé liga ba ministériu relevante.

Jornalista: Maria Auxiliadora

Editora: Rita Almeida

Notísia ne’ebé relasiona :

http://www.tatoli.tl/2017/12/lisensiamentu-sektoral-sei-implementa-inisiu-2018/

HUSIK IDA HATÁN